“Olympus Has Fallen”, “Agents of S.H.I.E.L.D.” və “Lucifer” kimi məşhur ekran layihələrində rol alan amerikalı aktyor və keçmiş peşəkar beysbolçu Lans Brodvey 43 yaşında vəfat edib. Aktyorun meyiti Texas ştatında yaşayış kompleksinin pilləkənlərində aşkarlanıb.
Denmedia.az ABŞ mediasına istinadən xəbər verir ki, hadisə noyabrın 17-də Dallas şəhərində, Lav-Fild hava limanının yaxınlığında yerləşən yaşayış kompleksində baş verib.
Yerli polisin məlumatına görə, axşam saat 18:42 radələrində daxil olan təcili çağırış əsasında hadisə yerinə əməkdaşlar göndərilib. Brodvey binanın pilləkənlərində huşsuz vəziyyətdə tapılıb. Hadisə yerində onun öldüyü müəyyən edilib.

Dallas Məhkəmə-Tibbi Ekspertiza İdarəsinin məlumatına əsasən, 43 yaşlı aktyorun ölüm səbəbi hələlik müəyyənləşdirilməyib. Hadisə ilə bağlı araşdırma davam etdirilir.
Aktyorun vəfatından əvvəl sosial şəbəkədə etdiyi son paylaşım da diqqət çəkib. Noyabrın 7-də “Instagram” hesabında paylaşım edən Brodvey futbol oynayan bacısı və ya qardaşı qızının fotolarını yayımlayaraq onun geyim tərzi ilə bağlı zarafatyana şərhlər yazıb.
Bu paylaşımından cəmi on gün sonra aktyorun ölüm xəbəri yayılıb.

1983-cü ildə Texasda anadan olan Lans Brodvey karyerasına peşəkar beysbolçu kimi başlayıb. O, ABŞ-nin “Chicago White Sox” və “New York Mets” komandalarında çıxış edib.
İdman karyerasını başa vurduqdan sonra aktyorluğa üz tutan Brodvey 2013-cü ildə Cerard Batler və Morqan Frimanın rol aldığı “Olympus Has Fallen” filmində ABŞ prezidentini qoruyan məxfi xidmət əməkdaşını canlandırıb.
Daha sonra “Agents of S.H.I.E.L.D.”, “Lucifer” və “Colony” kimi televiziya seriallarında rol alıb.
Aktyorun gözlənilməz ölümü ilə bağlı araşdırma davam edir. Rəsmi qurumlar ölümün səbəbi barədə yekun nəticə açıqlamayıblar.

