Dünyaca məşhur supermodel Sindi Kroufordun 27 yaşında vəfat edən oğlu Presli Gerberin ölümündən əvvəl baş verən hadisələrin yeni təfərrüatı məlum olub. Təcili yardım xidmətinə edilən zəngin səs yazısı gənc modelin həyatının son dəqiqələrində yaşananları üzə çıxarıb.
Daily Mail nəşrinin məlumatına görə, sentyabrın 20-də Presli Gerberin müalicə aldığı reabilitasiya mərkəzindən ABŞ-ın “911” təcili yardım xidmətinə ilk zəng səhər saat 09:35-də daxil olub.
İlkin olaraq sistemdə ürəyin dayanması ilə bağlı məlumat qeydə alınıb. Təxminən üç dəqiqə sonra çağırışın kateqoriyası “mümkün həddindən artıq doza” olaraq dəyişdirilib. Saat 09:40 radələrində isə çağırışa təcili müdaxilə statusu verilib.
Hadisə yerinə gələn tibb işçiləri saat 09:45-də Presli Gerberin ölümünü təsdiqləyiblər. Beləliklə, ilk təcili yardım çağırışından ölümün qeydə alınmasına qədər cəmi 10 dəqiqə keçib.
Santa-Monika polisi Berkli küçəsinin 1000-ci məhəlləsində yerləşən reabilitasiya mərkəzindən mümkün həddindən artıq doza ilə bağlı məlumat aldıqlarını bildirib.
Hadisə yerinə gələn polis əməkdaşları bir kişini həyat əlamətləri olmadan aşkar ediblər. Sonradan onun Presli Gerber olduğu müəyyənləşdirilib.
İlkin araşdırma zamanı zorakılıq əlamətləri aşkarlanmayıb.
Gənc modelin ölümünün dəqiq səbəbi hələlik müəyyən edilməyib.
Sentyabrın 21-də meyitin tibbi ekspertizası keçirilsə də, Los-Anceles dairəsinin məhkəmə-tibb ekspertləri yekun nəticə üçün əlavə müayinələrin aparılmasına ehtiyac olduğunu bildiriblər.
Əlavə analizlərin nəticələrinin bir neçə ay ərzində hazır ola biləcəyi qeyd olunub.
