Lənkəranda Veravulçayın daşması nəticəsində, rayonun Vilvan kəndində torpaq sürüşməsi baş verib.
Sel suları sakinlərin hektarlarla torpağını, istixanaları, sitrus və meyvə ağaclarını yuyub aparıb.
Den.az-ın yerli bürosunun verdiyi xəbərə görə Lənkəranda yağan intensiv yağışlar Veravulçayının daşmasına səbəb olub və 10 yaxın ailənin yaşadığı evlər üçün təhlükəli vəziyyət yaranıb. Vaxtilə 60 – 65 metr aralıda olan torpaq qatı indi evlərin 10 metrliyinə kimi yaxınlaşıb.
Torpaq uçqunu sakinlərin təsərrüfatlarına da xeyli ziyan vurub. Meyvə və sitrus ağaclarını, eləcə də torpaq sahələrini, salınan istixanaları aparıb. Təkcə istixanaların dağılması nəticəsində vətəndaşlara 3500 - 4000 manatlıq civarında ziyan dəyib.r olub.
Ərazidə yaranan vəziyyətlə bağlı Lənkəran rayon Yuxarı Xanbulançay Hidroqovşağı İstismar idarəsinin mütəxəssisi Ayıq Əliyev bildirib ki, idarə tərəfindən ağır texnikalar ayrılıb. Hava şəraiti imkan verən kimi, çayda məcradəyişmə işləri aparılacaq. “Sahilbərkitmə işləri aparmaq üçün də vətəndaşlar tərəfindən müraciətlər daxil olub. Hal – hazırda podratçı təşkilat bununla əlaqədar aşağı hissədə iş görür. Həmin yer də plana düşüb. Vəsait ayrılan kimi onun davamı keçiriləcək, o iş görüləcək” idarə mütəxəssisi bildirib.
Qeyd edək ki, hazırda çayda 2 km məsafədə sahilbərkitmə işləri görülür və tamamlanmaq üzrədir.
