“Formula-1”in keçmiş rəhbəri, 95 yaşlı Berni Ekklstoun Portuqaliyada qanunsuz silah saxlama şübhəsi ilə saxlanılıb. Hadisə onun şəxsi təyyarə ilə Tiriş aerodromuna enməsindən dərhal sonra baş verib. Polis yoxlaması zamanı onun yanında sənədləri qaydasında olmayan ov tüfəngi aşkarlanıb.
Ekklstoun “Daily Mail”ə bildirib ki, tüfəngi gil göyərçinlərə atıcılıq yarışı üçün gətirib. O, Portuqaliyaya daxil olmaq üçün tələb olunan xüsusi silah sənədinin — “mavi kitabça”nın yanında olmadığını deyib və polis prosedurunu ağır və yorucu proses kimi təsvir edib.
Məlumata görə, Ekklstoun bir müddət saxlanıldıqdan sonra buraxılıb, silah isə aidiyyəti prosedurlar üçün təhvil verilib. Bəzi mənbələr onun həbs olunduğunu yazsa da, Ekklstoun özü bunu inkar edib və polis tərəfindən sadəcə sorğu-sual edildiyini bildirib.
Bu, onun hava limanında silahla bağlı ilk insidenti deyil. 2022-ci ildə Braziliyada da onun üzərində qeydiyyata alınmamış tapança aşkarlanmışdı. Həmin vaxt o, cərimə və girov prosedurundan sonra sərbəst buraxılmışdı.
Berni Ekklstoun uzun illər “Formula-1”in əsas rəhbər simalarından biri olub və 2017-ci ilə qədər yarış seriyasının idarəçiliyində mühüm rol oynayıb.
