Taylandın beynəlxalq hava limanında gömrük əməkdaşları 19 yaşlı turist qızı saxlayıb, onun bədənində 30 diri tısbağa aşkar olunub.
Bu barədə The Pattaya News məlumat yayıb.
Bildirilib ki, Tayvan vətəndaşı VietJet Air reysi ilə Banqkokdan Taybeyə uçmaq istəyib və tısbağaları skotçla bədəninə yapışdıraraq gizlədib.
Şübhəli davranış təhlükəsizlik əməkdaşlarının diqqətini çəkib və yoxlama zamanı paltarının altında Hindistan ulduz tısbağaları tapılıb. Bu növ beynəlxalq səviyyədə ən yüksək qoruma siyahısına daxildir və qeyri-qanuni bazarda yüksək tələbat görür.
Qeyd olunur ki, yoxlama zamanı tısbağalardan biri ölü vəziyyətdə olub.
Faktla bağlı turist barəsində cinayət işi başlanıb, tapılan heyvanlar isə Taylandın Milli Parklar, Vəhşi Təbiət və Bitki Mühafizəsi Departamentinə təhvil verilib.
