Pomidor gündəlik qida rasionunun ən faydalı məhsullarından biri hesab olunur. Onun tərkibində ürək-damar sistemi, dəri sağlamlığı və həzm prosesini dəstəkləyə bilən bir sıra vitaminlər, minerallar və antioksidantlar var.
Bu barədə Egeszseg Kalauz nəşri məlumat yayıb.
Botaniki baxımdan pomidor meyvə hesab olunsa da, gündəlik qidalanmada daha çox tərəvəz kimi qəbul edilir. Bu məhsul aşağı kalorilidir və təxminən 95 faizi sudan ibarətdir. Buna görə də sağlam qidalanmaya üstünlük verən insanların menyusunda tez-tez yer alır.
Bundan başqa, pomidorun tərkibində C, E, K vitaminləri, B qrupu vitaminləri, fol turşusu, eləcə də kalium, maqnezium və qida lifləri var.
Pomidoru xüsusilə dəyərli edən maddə isə likopindir. Bu antioksidant ona xarakterik qırmızı rəng verir. Araşdırmaların nəticələri göstərir ki, likopinlə zəngin məhsulların müntəzəm qəbulu ürək-damar xəstəlikləri riskinin daha aşağı olması ilə əlaqəli ola bilər. Bununla belə, mütəxəssislər bildirirlər ki, likopin ən böyük faydanı balanslaşdırılmış qida rasionu və sağlam həyat tərzi çərçivəsində göstərir.
Mütəxəssislər həmçinin qeyd edirlər ki, pomidor bişirildikdən sonra orqanizm likopini daha asan mənimsəyir. Xüsusilə pomidor yağlarla, o cümlədən zeytun yağı ilə birlikdə istifadə edildikdə likopinin mənimsənilməsi daha yaxşı olur. Məhz buna görə tomat sousları, şorbalar və ya pürelər bu maddənin effektiv mənbəyi ola bilər.
Likopindən başqa, pomidorun tərkibində beta-karotin, C vitamini və kollagen istehsalı prosesində iştirak edən digər antioksidantlar da var. Tərkibində suyun çox olması bədəndə su balansını qorumağa kömək edir, liflər isə normal həzm prosesini dəstəkləyir. Pomidorun tərkibindəki kalium da su ilə birlikdə orqanizmdə maye səviyyəsinin tənzimlənməsinə yardım edir.
“Pomidor əksər insanlar üçün təhlükəsiz qida hesab olunsa da, bəzi şəxslər, məsələn, müəyyən oynaq problemləri və ya podaqrası olan insanlar öz fərdi reaksiyalarına diqqət etməlidirlər. Əgər kimdəsə pomidor qəbulundan sonra simptomlar güclənirsə, mütəxəssisə müraciət etmək tövsiyə olunur”, — məqalədə qeyd edilib.
