Çiy əti, o cümlədən toyuq ətini, eləcə də bəzi göbələkləri bişirməzdən əvvəl yumaq təhlükəli ola bilər.
Bu barədə “Gazeta.Ru”ya açıqlamasında ROSBİOTEX Universitetinin qida təhlükəsizliyi kafedrasının baş müəllimi Anna Cabakova bildirib.
Mütəxəssisin sözlərinə görə, bir çox insan toyuq ətini bişirməzdən əvvəl kranın altında yumağın vacib olduğunu düşünür. Lakin qida təhlükəsizliyi üzrə mütəxəssislər bunun əksini tövsiyə edirlər.
Cabakova qeyd edib ki, su salmonella və kampilobakter kimi bakteriyaları məhv etmir. Əksinə, yuma zamanı su damcıları mikroorqanizmləri mətbəx çanağına, masaya, qab-qacağa və dəsmallara yaya bilər.
Bu isə çarpaz çirklənmə riskini artırır.
Mütəxəssis vurğulayıb ki, ətin təhlükəsizliyi yumaqla deyil, tam termiki emal yolu ilə təmin olunur.
Cabakova əlavə edib ki, bəzi insanlar şampinyon göbələklərini də yuyur. Halbuki bu göbələklər süngər kimi suyu tez hopdurur. Nəticədə qızartma zamanı onların teksturası və dadı pisləşə bilər.
Peşəkar aşpazlar göbələkləri uzun müddət suda saxlamağı deyil, onları fırça və ya salfetlə ehtiyatla təmizləməyi məsləhət görürlər. Göbələklər yuyulacaqsa, bu, çox qısa müddətdə edilməlidir.
