"Paşinyan seçkilərə hazırlaşır, ancaq biz küçə etirazlarını dayandırmaq istəmirik" - Saqatelyan

“Görünən odur ki, Nikol Paşinyan seçkilərə hazırlaşır. Ancaq biz küçə etirazlarını dayandırmaq istəmirik və bununla barışa bilmirik”.

Den.az xəbər verir ki, bunu “Ermənistan” blokundan olan deputat İşxan Saqatelyan deyib.

“Paşinyan uzun müddətdir Ermənistan əhalisinin əksəriyyəti üçün maraqsız personaya çevrilib.  Ona görə də ailəsinin gündəlik məişət məsələlərini müzakirə edərək sosial şəbəkələr vasitəsilə birtəhər diqqəti özünə cəlb etməyə məcburdur. Ancaq Ermənistan ətrafında baş verənlər fonunda Paşinyanın bu cür davranışı cəmiyyətə istehza etməkdir. O, tükənib, artıq təhlükəsizlik məsələləri və real dünyada baş verənlər haqqında danışa bilmir”.

Saqatelyan əlavə edib ki, bir qüvvə və ya bir nəfər hakimiyyət dəyişikliyinə nail ola bilməz.

“Bəli, biz mükəmməl deyilik, amma hədəflərimizdə səmimiyik. Gücümüz çatmadığı üçün uğur qazana bilmədik. Əgər bunu bizdən yaxşı bacaran siyasi qüvvələr varsa, o zaman onlara kömək etməyə hazırıq. Amma biz öz məsuliyyətimizi başqalarının üzərinə qoymuruq. “Daşnaksütyun” partiyası seçkilərə getmə məsələsini müzakirə etməyib. Bu cür qərarlar partiyanın ən yüksək səviyyəsində qəbul edilir. Bu məsələ gündəmdə deyil”, – deyə Saqatelyan vurğulayıb.

Günəş Fərəh
Den.az