Nadir Qafarzadə: “Beş saat toy ərzində hətta bir yox, beş mahnı da fonoqram oxumaq olar, heç nə olmaz”

“Yarım saatlıq toya gələnlər onsuz da fonoqram oxuyurlar. Bilmirəm, təbii haldır, ya yox, axır ki, məsələ belədir. Bütün toyu idarə edən müğənni bir mahnı fonoqram oxuyubsa, bununla nə olacaq, dünya dağılacaq ki? Hə, oxuyub, oxuyub da. Buna görə adamı döymürlər, xəsarət yetirmirlər. Ən azından, xəbərdarlıq edirlər. Yəni bunu daha mədəni formada etmək olar. Hər halda sivil bir dövlətdə yaşayırıq, Avropaya inteqrasiya etmişik. Müğənni toyda elə mahnını fonoqram oxuyur ki, musiqiçilər onu müşaiyyət edə bilmirlər. Çünki o mahnı studiyada aranjiman olunub. Artıq tamaşaçı həmin mahnını efirdən, radiodan bu cür eşidib deyə, müğənni fonoqram oxumağa məcburdur ki, eyni effekt alınsın, gələcəkdə toyun diskinə baxanda daha keyfiyyətli səslənsin. Burada qəbahət bir şey yoxdur. Beş saat toy ərzində hətta bir yox, beş mahnı da fonoqram oxumaq olar, heç nə olmaz. Onsuz da bu adam canlı oxuyur. Canlı ifa edə bilən müğənninin bir-iki fonoqram oxuması bağışlanandır”.
 
Bu sözləri Den.az-a tanınmış müğənni Nadir Qafarzadə həmkarı Kərim Abbasovun fonoqram oxuduğu üçün toyda döyülməsinə münasibət bildirərkən deyib.
 
“10 il bundan əvvəl “Maral” mahnım yeni çıxanda Tovuz tərəfdə toyda idim. Məni şadlıq evinin açılışına dəvət etmişdirlər, həm də şadlıq evinin sahibi öz qızına toy edirdi. Məndən “Maral” mahnısını oxumağımı istədilər. Mən də başladım canlı musiqiçilərlə oxumağa. Toy yiyəsi mənə yaxınlaşıb dedi ki, Nadir bəy, mən bu “Maral”ı istəmirəm. Dedim ki, axı mən başqa “Maral” oxumamışam. Dedi ki, bilirəm, amma mən efirdə eşitdiyim tərzdə “Maral” mahnısını istəyirəm. Mən də dedim ki, ay müəllim, axı sizdən pul almışam. Dedi ki, yox, mənə fonoqram xoşdur, onu da siz oxumusunuz, mən oxumamışam ki. Yəni bundan ötrü toyda qanıqaraçılıq salmaq, qonaqların əhvalını pozmaq, bəy-gəlini də peşman etmək lazım deyildi. Dünya dağılmayıb, ölüm-itim yoxdur. Gözlə də, fonoqram bitəcək, bu adam yenə canlı davam edəcək”, - o bildirib.
 
N.Qafarzadə toylara hansı qiymətə getdiyi barədə isə rəqəm açıqlamaq istəməyib: “Baxmayaraq ki, qiymətlər dəyişdi, müğənnilərin çoxu toy qiymətlərini artırdılar. Onları da qınamaq olmaz, çünki bu saat hər şey bahalaşıb. Nəinki Azərbaycanda, Rusiyada, Türkiyədə və digər ölkələrdə də vəziyyət belədir. Dünən 1 manata aldığını bu gün 5 manata alırsan. Bahalaşmaya baxmayaraq, mən toyun qiymətini qaldırmadım. Amma özümə düşən paydan musiqiçilərimin pulunu qaldırdım. Düşünürəm ki, düz eləmişəm. Çünki yaxşı, keyfiyyətli musiqiçi tapmaq üçün yaxşı pul vermək lazımdır. Toya hansı qiymətə getməyimlə bağlı rəqəm deməyəcəyəm, çünki rəqəmlər dəyişə bilir. Məsələn, kimsə xatirini istədiyim bir insan zəng edir, deyir ki, övladımın toyudur, amma əlimdə bu qədərdir. Məkanı da nəzərə alıram, məkan bahalıdırsa, qiymət dəyişməyəcək. Məkan ucuzvaridirsə, qiyməti də nəzərə alırıq. Axı arada dostluq da var. Adam var ki, səninlə qiymət danışmır, amma ürəyindən keçən məbləği qabağıma qoyur ki, halal xoşun, xoşuma gəldi. Eləsi olur, qiymət deyirsən, sonda həmin məbləğin üstünə nə qədər əlavə qoyur, deyir ki, belə gözləmirdim, məndən sənə hədiyyə. Bizim qazancımız toylardandır. Toya getməyə məcburuq ki, səsimizdə inkişaf olsun. Mənim pulumu indiyə qədər kəsməyiblər. Havayı oxuduğumuz toylar da olub. Yenə də kiminsə xatirinə. Amma onda da musqiçinin pulunu kəsməmişəm. Evimdən pul vermişəm. Çünki musiqiçinin günahı yoxdur. Tanış mənimdir, bunun musiqiçiyə nə aidiyyatı? Demək istədiyim budur ki, insanlar incə yanaşsınlar. Toyda qanıqaraçılıq olmaz. Artıq bəylə gəlinin xatirində o toy dava toyu kimi qaldı. Toy sahibini tanımıram, amma onun da hisslərini başa düşürəm, insanıq. Dava salmamışdan qabaq 10-a qədər say, de ki, Allah Şeytana lənət eləsin. Dava düşdü, iş polisə qədər çıxdı. Nəyə lazım idi? Nə dəyişdi? Əsəb, stress... Onsuz da hər şey öz yerini alacaq, amma olan oldu. Gərək, olmazdı. Səbirli olardılar. Bilirəm, mənə yenə təhqirlər, söyüşlər yazacaqlar. Amma gənclərin toy günündə bir fonoqrama görə dava salmaq düzgün deyil. Allah gənclərimizi xoşbəxt eləsin!” Pravda.az