"Klanlarla idarə olunan və mövhumatla yüklənən qunşuluq təhlükə mənbəyidir" - ŞOK DETALLAR

"Dağıstan Respublikasında sabitliyi pozmaq üçün xaricdən, o cümlədən ukraynayönümlü Teleqram kanallarından cəhdlər edilir". Bunu Dağıstan rəhbəri Sergey Məlikov ötən gün Mahaçqala hava limanında baş verən insident haqda deyib. “Dağıstanda vəziyyəti gərginləşdirmək cəhdləri, o cümlədən etnik ədavətin və dinlərarası problemlərin qızışdırılması ilə bağlı qadağan olunmuş üsullardan istifadə düşmənlərimiz, ölkəmizin əleyhdarları tərəfindən həyata keçirilir”, - Məlikov bildirib.

Mövzunu "Den.az"a şərh edən politoloq Elxan Şahinoğlu bildirib ki, Dağıstandakı olaylar Rusiyada antisemit dalğanın güclənə biləcəyinin xəbərçisidir: "Rusiya və SSRİ tarixində yəhudilərə qarşı təşkil edilən hücumlar və yəhudilərin sıxışdırılması hər zaman olub. Elə İsraildə yaşayanların əksəriyyəti vaxtilə Rusiya imperiyasının ərazisini tərk edənlərin nəslindən olanlardır. Bəzi ölkələrdə anti-İsrail əhval ruhiyyəsi antisemit çağırışlara yol açıb. Fransanın özündə belə sinaqoqların divarlarına antisemit şüarlar yazılır. Azərbaycan tolerant ölkədir, məmləkətimizin tarixində və bugünündə heç zaman antisemitizm olmayıb, ancaq ətrafımızda baş verənlərdən çıxış edərək radikal çağırışların təhlükəsini də hesablamalıyıq. İsraili idarə edənlər anlamalıdırlar ki, “Həmas”ın terror hücumuna qarşı Qəzzanın kütləvi şəkildə bombalanması və mülki insanların qətli ilə “cavab” verilməsi ümumi gərginliyi artıracaq".

Politoloqun sözlərinə görə, Rusiya zəifləyə bilər, amma dağılması bizə sərf etmir: "Çünki dağılsa, ölkəmizin şimalında ipə-sapa yatmayan, indi ancaq Kremldən aldığı dotasiya və korrupsiya ilə dolanan 6-7 balaca, dayanıqsız ölkələr yarana bilər ki, bu da məmləkət üçün ciddi təhdiddir. Pulsuz, təhsilsiz, klanlarla idarə olunan və mövhumatla yüklənən qunşuluq təhlükə mənbəyidir."

Günəş Fərəh,

Den.az