Nəsiman Yaqublunun adı bülletendən necə çıxarılacaq? - MSK qərar qəbul etdi

Mərkəzi Seçki Komissiyası (MSK) seçki bülletenlərində namizəd kimi adı qeyd olunmuş Nəsiman Yaqublunun vəfatı ilə əlaqədar seçicilərə məlumatın çatdırılması qaydası ilə bağlı məsələsini müzakirə edib.

Den.az xəbər verir ki, bu barədə bu gün MSK-nın iclasında məsələ müzakirəyə çıxarılıb. 
 
Mərkəzi Seçki Komissiyasının sədrinin müavini Rövzət Qasımov qeyd edib ki, 2024-cü il sentyabrın 1-nə təyin edilmiş Milli Məclisə seçkilərdə 125 saylı Zəngilan-Qubadlı seçki dairəsi üzrə qeydə alınmış namizəd Nəsiman Yaqublunun vəfatı ilə bağlı məlumat seçki dairəsinin məntəqə seçki komissiyalarının məlumat lövhələrində yerləşdirilməlidir.

Seçki Məcəlləsinin tələbinə əsasən, bəzi namizədlər çıxdıqda və ya namizədliyi ləğv edildikdə həmin məlumatlar seçki məntəqələrinin müvafiq lövhəsində yerləşdirilir. Nəsiman Qara oğlu Yaqublunun vəfat etməsi barədə məlumat da seçki lövhələrində yerləşdiriləcək.
 
Müzakirələrdən sonra qərar qəbul edilib.
 
***
14:22
Avqustun 25-də seçicilərlə görüşdən sonra Bakıya qayıdarkən yol qəzasında həyatını itirən tarixçi-professor Nəsiman Yaqublu sentyabrın 1-də keçiriləcək növbədənkənar parlament seçkilərində namizəd idi. Onun namizədliyi Müsavat Partiyası tərəfindən 125 saylı Zəngilan - Qubadlı seçki dairəsindən irəli sürülmüşdü.
 
Növbədənkənar parlament seçkilərində istifadə ediləcək bülletenlər artıq çap edilib. Belə olan halda Nəsiman Yaqublunun adı seçki büllütenindən necə çıxarılacaq?
 
Den.az-ın məlumatına görə, Mərkəzi Seçki Komissiyası (MSK) bu gün Nəsiman Yaqublu haqqında məsələni müzakirə edəcək. 
 
İclasda Nəsiman Yaqublunun vəfatı ilə əlaqədar seçicilərə məlumatın çatdırılması qaydası ilə bağlı qərar qəbul olunacaq.
 
Seçki Məcəlləsinin 99.10-cu maddəsinə görə, seçki bülletenləri hazırlandıqdan sonra bəzi namizədlər çıxdıqda və ya onların qeydiyyatı ləğv edildikdə, Mərkəzi Seçki Komissiyasının qərarı ilə dairə və ya məntəqə seçki komissiyaları seçki bülletenlərindən belə namizədlər və ya siyasi partiyalar, siyasi partiyaların blokları barədə məlumatları, çap olunmuş seçki bülletenində qeydə alınmış namizəd, siyasi partiya, siyasi partiyaların bloku haqqında məlumata əlavə və ya dəyişikliklər haqqında  müvafiq məlumatları məntəqə seçki komissiyasının məlumat lövhəsində yerləşdirir.
 
Əvvəlki illərdə seçki bülletenlərində adları çıxarılan namizədlərin adının üzərindən xətt çəkilməsi praktikasından da istifadə edilib.