Ödündən əməliyyat olunan Elcan Rəsulovun səhhəti AĞIRLAŞIB? - FOTO

Xəbər verdiyimiz kimi, ödündən əməliyyat olunan aparıcı və aktyor Elcan Rəsulovun bir neçə gün əvvəl səhhəti yenidən pisləşib. 

Den.az xəbər verir ki, sənətçi bir neçə gün sürən səssizliyini pozaraq, sağlamlıq vəziyyəti ilə bağlı sosial şəbəkə hesabında məlumat paylaşıb. 

E.Rəsulov bildirib ki, ilk müalicə aldığı özəl klinika onun əməliyyata ehtiyacı olmadığını desə də, gözlənilmədən vəziyyəti ağırlaşdığı üçün hospitala təcili əməliyyata götürülüb:

"Çox zənglərə cavab verə bilmirəm. İndi şükür əlim telefon tuta bilir. İyulun 24-ü gecə aparıcısı olduğum "Elcanlı" verilişinin efirində vəziyyətim pisləşdi. Yəni "tutma"larım başladı. Bundan iki gün əvvəl də öd kisəmdə ağır "tutma"larım olmuşdu. Təcili yardımla Mərkəzi Klinikaya yerləşdirildim. Oradan da analiz və MRT nəticələrimə əsasən bildirdilər ki, təcili əməliyyat olunmalıyam.  

Düşündüm həftənin dördüncü günü efirdən sonra dərhal əməliyyat etdirərəm və üç günə sağalıb geri dönərəm. Maraqlanmışdım ki, öd kisə əməliyyatı elə də çətin əməliyyat deyil. Xəbər saytları vəziyyətimin pisləşməsini ayağımla əlaqələndirmişdirlər. Amma bu, belə deyildi. Məsələ ödümlə bağlı idi.  

USM və MRT nəticələrimi görən bütün həkimlər də əməliyyatın qaçılmaz olduğunu bildirdilər. İyulun 24-ü öz avtomobilimlə Medera hospitalına getdim. Orada mənim üçün palata ayırmışdırlar. Gecə ağrıkəsicilər vurdular ki, artıq səhər əməliyyat olunum.  
Səhər tanınmış cərrah gəlib mənimlə tanış oldu. Əməliyyat üçün analizlərimi də götürdülər. Daha sonra cərrah söylədi ki, əməliyyata ehtiyac qalmadı. Səni müalicə edib buraxacağıq evə. Açığı özüm də sevindim. Beləcə müalicəm başladı.

Ortada vəziyyətim dəyişmədi deyə müalicə etməyə qərar verən cərrah məni infeksionistə təhvil verdi. Yeni gələn infeksionist isə bildirdi ki, “zəif antibiotiklərdən istifadə olunub deyə kömək etmir. Keçirik daha güclülərinə”. Və keçdik.  

Mən isə artıq hər saat daha da ağırlaşıram. Yalnız ağrıkəsici vurulan anlarda bir neçə saatlıq yaxşı olurdum. Hətta bu yaxşı vaxtların birində evə getmək istəyimi bildirdim.

İki dərmanlıq resept gətirib verdilər ki, bazar günü gedərsiniz evə. Elə şənbə günü axşamçağı rəhbərliyim və dostlarım adəti üzrə məni ziyarətə gəlmişdilər.

Nəticələrimi istədilər, baxdılar ki, gəldiyim gündən bu yana nəticələr daha pisdir. Hətta su da içə bilmirəm. Yenidən infeksionisti evdən çağırdılar, gəldi baxdı, dedi "etdiyiniz müalicələr effekt verməyib. Müalicələri dəyişəcəyik”.  

Bu nəticələrdən əsəbiləşən dostlarım birdən birə nəticələrimi bütün həkimlərə göndərib hamıdan kömək istəməyə başladılar. Gələn cavablar isə birmənalı oldu. Təcili kateyə salıb, nəticəyə baxıb əməliyyat etmək lazımdır.  

Məlum oldu ki, mən qaldığım klinikada kate yoxdur, başqa klinikaya gedib gəlmək lazımdır. Nə isə vaz keçdik. Bir dostumun vasitəsilə məni əməliyyat etməyi bir həkim öz üzərinə götürdü.

Beləliklə, Medera hospitalının həyətinə BonaDea hospitalının təcili yardım avtomobilini çağırıb oradan götürüldüm. Nəticələrə baxdıqdan sonra cərrah əməliyyatın təcili olduğunu dedi və gecə 00:00-da əməliyyata götürüldüm.  

Hamının yarım saata etdirdiyi öd əməliyyatım 3 saat yarım çəkdi və şükür Allaha ölmədik. Əməliyyat zamanı o da məlum oldu ki, artıq öd kisəm 2 yerdən deşilibmiş və infeksiya bədənə keçməyə başlayırmış.  
Allah ailəmin göz yaşlarına, dualarına, dostlarımın dualarına bağışladı məni. Mənim üçün bu çətin günlərdə əziyət çəkən hər kəsə çox təşəkkür edirəm. Sağalım, çalışacam heç kimin etdiyini cavabsız qoymayım". /Gundem.az/