Gürcüstanın paytaxtı Tiflisdə yenidən vətəndaş etirazları başlayıb

Gürcüstanın paytaxtı Tiflisdə yenidən vətəndaş etirazları başlayıb.

Den.az xəbər verir ki, bu barədə “Novosti-Georgia” nəşri məlumat yayıb

Son həftələrdə müxalif partiyalar tərəfindən həyata keçirilən aksiyalardan fərqli olaraq, bu gün “daitove” sosial platforması sosial şəbəkələr vasitəsilə aksiya təşkil edərək insanları küçələrə çıxarıb.

Nəşrin məlumatına görə, bu, Facebook sosial şəbəkəsinin gürcü seqmentində ən aktiv və böyük sosial qruplardan biridir. Xarici agentlər haqqında qanuna qarşı kütləvi etirazlar zamanı da həmin sosial platforma etirazlara dəstək olmaq üçün bölgələrdən gələnlərə nəqliyyat və pulsuz mənzillə köməklik göstərib.

Hazırda adıçəkilən platformanın 200 mindən çox aktiv üzvü var. Onların əhəmiyyətli bir hissəsi gənclərdir. Lakin aksiyaya müxtəlif yaşlarda olan insanlar gəlib. “Daitove” Gürcüstanı Avropanın bir hissəsi kimi görmək istəyən hər kəsi mitinqə gəlməyə çağırıb.

Aksiya təşkilatçılarının tələbi dəyişməzdir. Onlar oktyabrın 26-da Gürcüstanda keçirilən parlament seçkilərinin saxta və qeyri-legitim kimi tanınmasını, xüsusi beynəlxalq komitənin nəzarəti altında yeni seçkilər təyin edilməsini istəyirlər.

Günəş Fərəh
Den.az