Paris, London və Berlin Ukraynaya qoşun göndərməyə hazırdır - Lombard

ABŞ prezidenti Trampın atəşkəs rejimini təmin etmək üçün Ukraynaya Avropa sülhməramlı qüvvələrinin göndərilməsi təklifindən sonra Parisdən Fransa, Almaniya və Böyük Britaniyanın mövqeyi ilə bağlı açıqlama gəlib.

Den.az xəbər verir ki, Fransanın maliyyə naziri Erik Lombard atəşkəsi təmin etmək üçün Paris, London və Berlinin Ukraynaya qoşun göndərməyə hazır olduqlarını bildirib.

“Ukrayna ilə bağlı texniki müzakirələrə başlamışıq. Atəşkəsi təmin etmək üçün Avropa qoşunlarının Ukraynaya göndərilməsi ilə bağlı ümumi konsensus var. Britaniya, Almaniya və Fransa buna hazırdır və digər Aİ ölkələri də öz töhfəsini verəcək. Atəşkəs əldə edildikdən sonra qoşunlar ora gedəcək və təhlükəsizliyi təmin edəcək", - Lombard deyib.

Lombard ABŞ prezidenti Donald Trampın atəşkəs rejimini dəstəkləməyə razı olduğunu bildirib, lakin Vaşinqtonun hansı addımları atacağını hələ təsdiqləmədiyini qeyd edib. Hərbi əməliyyatlar dayandırıldıqdan sonra Ukraynaya avropalı sülhməramlıların yerləşdirilməsi ilə bağlı açıqlama verən Kremlin sözçüsü Dmitri Peskov NATO ölkələrindən sülhməramlıların Ukrayna ərazisində olmasının qəbuledilməz olduğunu vurğulayıb.

Peskov qeyd edib ki, ABŞ hazırda Ukrayna ilə bağlı daha balanslı mövqe nümayiş etdirir və bu, münaqişəyə son qoymaq istəyinin real olduğunu göstərir.

Günəş Fərəh
Den.az