Avropa Komissiyası Amazon Web Services (AWS) və Microsoft Azure bulud xidmətlərinin fəaliyyətinə qarşı üç ayrı araşdırma başladıb. Bu proses rəqəmsal bazarları tənzimləyən və texnoloji nəhənglərin təsirini məhdudlaşdırmağı hədəfləyən Rəqəmsal Bazarlar Aktına (DMA) uyğun şəkildə aparılır. Məqsəd — böyük şirkətlərlə kiçik rəqiblər arasında bərabər rəqabət mühitini təmin etmək.
Araşdırmalardan biri xüsusilə DMA-nın bulud xidmətləri sektorunda antirəqabət təcrübələrinə qarşı effektiv işləyib-işləmədiyini qiymətləndirməyə imkan verəcək.
Avropa İttifaqının rəqabət üzrə rəhbəri Tereza Ribera bildirib:
“Mövcud DMA qaydalarının yenilənməsinə ehtiyac olub-olmadığını nəzərdən keçirəcəyik ki, Avropa bulud sektorundakı sürətlə dəyişən təcrübələrlə ayaqlaşa bilsin.”
Araşdırmanın 12 ay ərzində tamamlanması planlaşdırılır.
AWS hal-hazırda dünyanın ən böyük bulud xidmətləri təminatçısıdır. Ondan sonra Microsoft Azure və Alphabet şirkətinə məxsus Google Cloud gəlir.
