ABŞ dövlət katibi Marko Rubio, vitse-prezident Ceyms Devid Vens və Pentaqon rəhbəri Pit Heqset İranla müharibədə uğursuzluq səbəbindən ABŞ prezidenti Donald Trampdan uzaqlaşa bilərlər. Bu barədə keçmiş CIA analitiki Rey Makqovern Judging Freedom YouTube kanalında bildirib.
Ekspertin sözlərinə görə, vəziyyət Trampa Yaxın Şərqdəki müharibə ilə bağlı nə və kimlərin məlumat verməsindən asılıdır. Makqovern qeyd edib ki, bir çox sağlam düşüncəli insanlar ABŞ-ın İranla qarşıdurmada uğursuz olduğunu anlayır.
“Rubio, Heqset və ya Vensin bunu ona deyib-demədiyini bilmirəm. Amma onların bu batan gəmidən siçanlar kimi tullanacağını gözləmək olar”, — deyə Rey Makqovern bildirib.
Onun qiymətləndirməsinə görə, Trampı çətin vəziyyətə İsrail rəhbərliyi salıb və o hazırda “iki od arasında qalıb”.
Bundan əvvəl isə Missuri Universitetinin professoru Maykl Hadson bildirib ki, ABŞ generalları Donald Trampın nüvə müharibəsinə səbəb ola biləcəyindən ehtiyat edir.
Onun sözlərinə görə, hazırda ABŞ-da “irrasional model” mövcuddur və bu, Ağ Evdəki “situasiya otağında” baş verən mübahisələrlə də özünü göstərir. Hadson iddia edib ki, generallar Trampa nüvə silahı kodlarını verməkdən imtina edir, çünki onların fikrincə, o, “keçən şənbə bu silahdan istifadə edə bilərdi”.
