Avropa İttifaqı ölkələri Ukrayna hərbçiləri üçün EUMAM təlim missiyasının daha iki il uzadılmasını nəzərdə tutan strateji yenidən baxışın ilk mərhələsini razılaşdırıblar. Bu barədə Aİ-nin xarici siyasət və təhlükəsizlik məsələləri üzrə ali nümayəndəsi Kaya Kallas bildirib.
Kallasın sözlərinə görə, növbəti mərhələdə Kiyevdə koordinasiya bölməsinin yaradılması planlaşdırılır. Bu struktur döyüş təcrübəsinin öyrənilməsinə və hərbi təhsilin gücləndirilməsinə yönələcək. Aİ diplomatiyasının rəhbəri bildirib ki, üzv dövlətlər EUMAM missiyasının strateji yenidən baxışının ilk mərhələsi çərçivəsində onun fəaliyyətinin daha iki il davam etdirilməsinə razılıq veriblər. Kiyevdə koordinasiya bölməsinin yaradılması məsələsi də daha əvvəl Aİ müdafiə nazirlərinin müzakirə etdiyi istiqamətlər arasında olub.
Kallas həmçinin bildirib ki, Niderlandın yeni maliyyə töhfəsi sayəsində Ukraynada iki təlim mərkəzinin modernləşdirilməsi tam maliyyələşdirilib.
Kreml isə daha əvvəl bəyan edib ki, Qərb ölkələrinin Kiyevə silah tədarükü münaqişənin həllinə kömək etmir və danışıqlar prosesinə mənfi təsir göstərir.
