"Azərbaycanla Ermənistan arasında bu ilin sentyabrında baza sənədi (Çərçivə sazişi) imzalanması mümkündür. İkitərəfli danışıqlar gedir və Azərbaycanın Ermənistana təqdim etdiyi növbəti təkliflər paketi məhz baza sənədinin imzalanmasını zərurətə çevirir".
Bu fikirləri "Den.az"a açıqlamasında politoloq Məhəmməd Əsədullazadə deyib.
"Xarici işlər nazirləri Almatıda görüşəcək. Görüşdə bir neçə məsələlər üzərində razılaşma əldə edilməsi gözlənilir. Ermənistanda revanşistlər maksimum çalışır ki, Azərbaycanla gözlənilən razılaşmanın qarşısı alınsın. Erməni kilsəsi və müxalifət aktiv şəkildə bunun üçün fəaliyyət göstərir. Rusiya tərəfinə gəldikdə, Kreml Azərbaycanla Ermənistan arasında razılaşmaya etiraz etməyəcək. Prezident İlham Əliyevin Moskvada Vladimir Putinlə görüşündə bu məsələlər müzakirə olunub. Ona görə də, Rusiya bu məsələdə neytral qalacaq. Qazaxıstan prezidentinin Ermənistana səfərində bir çox məsələlər razılaşdırılıb. Hətta Zəngəzur yolunun Ermənistanın tam nəzarəti əsasında açılması haqda razılıq əldə edilib", - politoloq vurğulayıb.
Günəş Fərəh,
Den.az
