Paraqvayın keçmiş prezidenti Santyaqo Penyanın dəbdəbəli malikanəsində aparılan axtarış zamanı gizli keçid və yüksək mühafizə sisteminə malik seyf aşkarlanıb.
ABC Color nəşrinin məlumatına görə, noyabrın 8-də paytaxt Asunsion yaxınlığındakı San-Bernardino şəhərində yerləşən malikanəyə prokurorluq və polis əməkdaşları tərəfindən baxış keçirilib.
Axtarış zamanı otaqlardan birində saxta divarın arxasında gizli keçid və xüsusi mühafizə olunan qapı müəyyən edilib. Qapının rəqəmsal şifrə və biometrik tanıma sistemi ilə qorunduğu bildirilir.
Təhlükəsizlik sisteminin mürəkkəbliyi səbəbindən əməkdaşlar seyfi aça bilməyiblər. İçərisində nələrin olduğu hələlik məlum deyil.
Təxminən 2 milyon dollar dəyərində qiymətləndirilən malikanə “Ueno Bank”ın maliyyə böhranı ilə bağlı aparılan istintaq çərçivəsində yoxlanılıb.
Qeyd edək ki, Santyaqo Penya bankla bağlı qalmaqaldan sonra noyabrın 6-da prezident vəzifəsindən uzaqlaşdırılıb. Ona etimaddan sui-istifadə və vəzifə səlahiyyətlərindən şəxsi maraqları naminə istifadə ittihamları irəli sürülüb.
Hazırda istintaq keçmiş prezidentin əmlakını və bankla maliyyə əlaqələrini araşdırır.
