Qara dənizin Türkiyə sahillərinə yaxın hissəsində iki tankerdə baş verən yanğınların səth dronlarının zərbəsi nəticəsində yarana biləcəyi ehtimal edilir. Bu barədə Habertürk telekanalı məlumat yayıb.
Jurnalistlərin qeyd etdiyinə görə, Türkiyənin Dənizçilik İdarəsi əvvəlcə hadisəyə “xarici təsirin” səbəb olduğunu açıqlamışdı, lakin zərbənin konkret mənbəyi barədə əlavə məlumat verilməmişdi.
Hadisə ilə bağlı məlumatı Türkiyənin Nəqliyyat Nazirliyi də təsdiqləyib. Bildirilib ki, söhbət Qambiya bayrağı altında üzən “Virat” tankerindən və Misirdən Novorossiyskə yollanan “Kairos” gəmisindən gedir.
“Virat” təxminən 35 dəniz mili məsafədə zərbə alıb. Gəmidə olan 20 nəfərin hamısı sağlam vəziyyətdədir.
“Kairos” tankerinin isə dəniz minasına toxunması ehtimalı istisna edilmir. Gəmidəki 25 nəfər heyət tam şəkildə təxliyə olunub, onların arasında azərbaycanlı və ya rusiyalı vətəndaş yoxdur.
Kocaeli valisi İlhamı Aktaş bildirib ki, yanğının səbəbləri ilə bağlı bütün versiyalar araşdırılır, o cümlədən minaya toxunma ehtimalı da nəzərdən keçirilir. “Kairos” gəmisinin batma riski yoxdur.
