Almaniyanın Frankfurt şəhərində yaşayan cütlük, üç azyaşlı övladı Frankfurt Gənclər İdarəsinin nəzarətinə verildikdən sonra Türkiyəyə deportasiya edilib.
Uşaqların hamısı yetkinlik yaşına çatmayıb və hazırda Jugendamtın himayəsində saxlanılır. Valideynlərin ölkədən çıxarılması isə ictimaiyyət və insan hüquqları müdafiəçiləri arasında ciddi etiraz doğurub.
Hessen Qaçqınlar Şurası hadisəni “qalmaqal” adlandıraraq bildirib ki, uşaqlar dövlət müdafiəsi altında olduqları halda valideynlərin deportasiyası ailə bütövlüyü və uşaqların üstün mənafeyi prinsipləri baxımından ciddi suallar yaradır.
Məlumata görə, Frankfurt Gənclər İdarəsi fevral ayında uşaqların təhlükəsizliyini əsas gətirərək valideynlərin qəyyumluq hüququnu müvəqqəti dayandırıb və uşaqlara rəsmi qəyyum təyin edib.
3 yaşlı, 1,5 yaşlı və 5 aylıq üç uşaq ailədən kənar qoruyucu mühitə yerləşdirilib. Qərarın daimi qəyyumluq qərarı deyil, uşaqların təhlükəsizliyini təmin etmək üçün tətbiq olunan müvəqqəti tədbir olduğu bildirilir.
Hessen Qaçqınlar Şurasının ailəyə dəstək göstərən şəxslərə istinadən yaydığı məlumata görə, valideynlərin övladları ilə görüşmək hüququ qüvvədə qalıb.
Lakin cütlüyün Türkiyəyə deportasiya edilməsi səbəbindən ailənin uzun müddət ayrı qalmaq riski ilə üzləşdiyi vurğulanır.
