İspaniyalı futbolçu Pedro Rodriges 39 yaşında peşəkar futbolçu karyerasını başa vurduğunu açıqlayıb.
Pedro qərarını sosial şəbəkə hesabında paylaşdığı vida mesajı ilə elan edib.
“Həyatımda irəliyə doğru addım atmağın və yeni mərhələyə başlamağın vaxtının çatdığını hiss edirəm”, – futbolçu bildirib.
20 illik peşəkar karyerası ərzində Pedro “Barselona”, “Çelsi”, “Roma” və “Latsio” klublarının formasını geyinib.
Karyerasının ən uğurlu dövrünü “Barselona”da keçirən ispaniyalı futbolçu Kataloniya klubu ilə 20 böyük titul, o cümlədən üç UEFA Çempionlar Liqası kuboku qazanıb.
Pedro “Çelsi”nin heyətində isə İngiltərə çempionu olub, İngiltərə Kubokunu və UEFA Avropa Liqasını qazanıb.
O, İspaniya millisinin heyətində də futbol tarixinin ən böyük uğurlarına imza atıb. Pedro milli komanda ilə 2010-cu ildə dünya, 2012-ci ildə isə Avropa çempionu olub.
Beləliklə, klub və milli komanda səviyyəsində ən nüfuzlu kubokları qazanan Pedro 39 yaşında peşəkar futbol karyerasına nöqtə qoyub.
