Portuqaliya millisinin baş məşqçisi Jorje Jezuş Kriştianu Ronaldunun anası Dolores Aveyronun “Oğlumu aldatdılar” sözlərinə münasibət bildirib.
BBC-nin məlumatına görə, təcrübəli mütəxəssis Uelslə Millətlər Liqası matçı öncəsi keçirilən mətbuat konfransında bu barədə suala istehzalı cavab verib.
“İndi mən Kriştianu Ronaldunun anasına da cavab verməliyəm?” – deyən Jezuş daha sonra əlavə edib:

“O, çox hörmət etdiyim xanımdır. Övladlarını böyütmək üçün çox əziyyət çəkib”.
Xatırladaq ki, Ronaldunun anası oğlunun millidən ayrılması ilə bağlı danışarkən onun aldadıldığını iddia edib. O, Portuqaliyanın Danimarkaya 4:1 hesabı ilə məğlub olmasına sevindiyini də gizlətməyib.
“Əlbəttə, oğlum çox kədərləndi. Onu aldatdılar. Mən də üzgünəm. Danimarkaya məğlubiyyət isə layiqli idi. Açığı, buna sevindim”, – deyə Aveyro bildirib.
41 yaşlı Ronaldo noyabrın 5-də Portuqaliya millisindəki karyerasını başa vurduğunu elan edib. O, yığmanın heyətində 234 oyuna çıxıb və 146 qol vurub.
Futbolçu sentyabrda Danimarka ilə qarşılaşmada əsas heyətdə yer almayacağını öyrəndikdən sonra millinin düşərgəsini tərk edib. Buna görə 30 günlük cəza alıb və 215 funt sterlinq cərimələnib.
Jezuş Ronaldo ətrafındakı müzakirələrin nə vaxt bitəcəyini bilmədiyini deyib: “Siz gələn il də Ronaldo barədə soruşsanız, yenə cavab verəcəyəm”.

