Nadir Səlifovu Rövşən Canıyevin qətlinə görə öldürüblər - Prokuror açıqladı - FOTO

Azərbayanlı kriminal avtoritet Nadir Səlifovun 2020-ci ildə Türkiyənin Antalya şəhərində qətlə yetirilməsi ilə bağlı məhkəmə prosesi davam edir.
“Den.az” xəbər verir ki, Manavqat 2-ci Ağır Cəza Məhkəməsində keçirilən prosesdə təqsirləndirilən şəxslər Rəsul Həsənov və Əli Mövlamlı məhkəmə zalında iştirak edib. 
Qətlə görə digər təqsirləndirilənlər Xaqan Zeynalov, Əmir Həmidli, başqa bir cinayətdə təqsirli bilinən Ümid Nəcəfov isə prosesə saxlanıldıqları həbsxanadan onlayn olaraq qatılıblar. 
Ev dustaqlığında olan Cəmil Keleş, Erkan Aşan və Nürsen Arasoğlu iclasa qatılmayıb.
İclasda prokuror işin mahiyyəti ilə bağlı fikirlərini açıqlayıb. O, Nadir Səlifovun qətlinin digər azərbaycanlı kriminal avtoritet Rövşən Canıyevin (Lənkəranski) qisasının alınması məqsədilə törədildiyini açıqlayıb.
Prokuror mahiyyəti üzrə rəyində bildirib ki, Rövşən Canıyevin qətlindən sonra onun qardaşı Namiq Caniyev tərəfindən yeni təşkilat yaradılıb.
Prokuror Cəfər Əlizadə, Namiq Canıyev, Xanımnisə Məmmədova və Camal Həsənovun həbs olunmadıqlarına görə cinayət işlərinin ayrıca icraata götürülməsini, onlar barəsində qiyabi həbs-qətimkan tədbirinin seçilməsini istəyib.
O, digər təqsirləndirilən şəxslər Əli Mövlamlı, Əmir Həmidli, Cəmil Keleş, Erkan Aşan, Xaqan Zeynalov, Nürsen Arasoğlu, Rəsul Həsənov, Ümid Nəcəfovun qəsdən adam öldürmə cinayətinə görə ayrı-ayrılıqda ömürlük azadlıqdan məhrum edilməsini istəyib. 
İclasda çıxış edən təqsirləndirilən şəxslər hadisədə iştirak etmədiklərini iddia edərək, azadlığa buraxılmalarını və bəraət hökmünün çıxarılmasını tələb ediblər. Vəkilləri müdafiəyə hazırlaşmaq üçün vaxt istəyiblər.
Qeyd edək ki, Nadir Səlifov yaxın adamlarından olan Xaqan Zeynalov tərəfindən silahla başından iki dəfə atəş açılaraq öldürülüb. Səlifovun adamlarının cavab atəşi açması nəticəsində yaralanan Xaqan Zeynalov hoteldən qaçaraq onu gözləyən Əmir Həmidlinin idarə etdiyi kirayə götürülən maşını ilə qaçıb. 
Dənizlidə şübhəli bilinən Xəqan Zeynalov və Əmir Həmidli polis tərəfindən yaxalanıb. Avtomobilə baxış zamanı şübhəlilərlə birlikdə tapança və bıçaq ələ keçirilib. Saxlanılan şübhəlilərdən Zeynalov xəsarət aldığı üçün xəstəxanaya çatdırılıb və ona tibbi yardım göstərilib.