Yüksək intensivlikli interval məşqləri ürək-damar xəstəlikləri olan pasiyentlərdə damarların vəziyyətini digər fiziki yüklənmə növlərindən daha effektiv yaxşılaşdırır. Bu barədə European Journal of Preventive Cardiology jurnalında dərc olunan araşdırmada bildirilib.
6800-dən çox pasiyentin iştirak etdiyi 37 tədqiqatın təhlili göstərib ki, fiziki aktivlik ümumilikdə damarlar üçün faydalıdır, lakin nəticə məşqin növündən ciddi şəkildə asılıdır. Ən güclü təsir məhz yüksək intensivlikli interval məşqlərində müşahidə olunub — bu yüklənmələr damarların genişlənmə qabiliyyətini xeyli artırır ki, bu da onların sağlamlığının əsas göstəricilərindən sayılır.
Bu effekt onunla izah olunur ki, intensiv hərəkət və istirahətin növbələşməsi qan dövranını gücləndirir və damarları qoruyan, elastikliyini artıran azot oksidinin ifrazını stimullaşdırır. Orta intensivlikli məşqlər də müsbət nəticə verib, lakin təsiri xeyli zəif olub.
Tədqiqat müəllifləri qeyd edir ki, bu nəticələr kardioreabilitasiya yanaşmalarını dəyişə bilər — düzgün nəzarət altında daha intensiv proqramlar standart məşqlərdən daha effektiv ola bilər. Bununla belə, yüklənmənin seçimi mütləq pasiyentin vəziyyətinə uyğunlaşdırılmalı və mütəxəssislərin nəzarəti altında aparılmalıdır.
