Gecə yemək yeməyi hər zaman zərərli hesab etmək düzgün deyil. Gün ərzində kifayət qədər qidalanmayan insan axşam və ya gecə orqanizminin ehtiyaclarını ödəməyə çalışır.
Bu barədə endokrinoloq və dietoloq Anna Plotnikova “Lenta.ru” nəşrinə açıqlamasında bildirib.
Həkimin sözlərinə görə, gecə aclığının qarşısını almaq üçün gün ərzində düzgün və balanslı qidalanmaq vacibdir.
Mütəxəssis izah edib ki, orqanizmin fəaliyyəti günün işıqlı saatlarına uyğun dəyişir. Səhər oyandıqdan sonrakı ilk saatda enerji və oyanıqlıqla əlaqəli kortizol hormonunun səviyyəsi yüksəlir. Bu saatlarda testosteronun səviyyəsi də artır, hüceyrələrin insulinə həssaslığı yüksəlir və maddələr mübadiləsi fəallaşır.
“Səhər bəzən şirniyyat və adətən özünüzə qadağan etdiyiniz qidalardan da yeyə bilərsiniz”, – deyə həkim bildirib.
Onun sözlərinə görə, günün ikinci yarısında kortizolun səviyyəsi tədricən sabitləşir, saat 18:00–19:00-dan sonra azalır, 21:00-dan sonra isə yuxu hormonu olan melatoninin səviyyəsi yüksəlir.
Bu dəyişikliklər maddələr mübadiləsinə təsir göstərir. Lakin həkim vurğulayıb ki, axşam yeyilən hər qidanın mütləq piyə çevrildiyini düşünmək yanlışdır.
Plotnikovanın sözlərinə görə, gündüz az yeyib axşam həddindən artıq qidalanmaq və gecələr tez-tez qəlyanaltı etmək maddələr mübadiləsinin yavaşlamasına, xüsusilə qarın və bel nahiyəsində piy toplanmasına səbəb ola bilər.
Mütəxəssis səhər yeməyində zülal, yağ və mürəkkəb karbohidratlara yer ayırmağı, gün ərzində doyumlu və balanslı qidalanmağı tövsiyə edib.
Axşam isə zülal və liflə zəngin, daha yüngül qidalara üstünlük verməyi məsləhət görüb. Həkimin fikrincə, belə qidalanma həzm sistemini həddindən artıq yükləmir.
