ABŞ-nin Yel Universitetinin alimləri prostat xərçənginin ağır mərhələsində olan xəstələrdə şişlərin aktivliyini azaltmağa və ağrıları yüngülləşdirməyə kömək edən yeni eksperimental preparatı sınaqdan keçiriblər.
Araşdırmanın nəticələri “Journal of Clinical Oncology” elmi jurnalında dərc olunub.
Tədqiqat zamanı bavdeqalutamid adlı preparatın metastatik, kastrasiyaya davamlı prostat xərçəngindən əziyyət çəkən xəstələrə təsiri öyrənilib. Xəstəliyin bu formasında testosteron səviyyəsi azaldılsa belə, şiş böyüməyə davam edir.
Yeni preparat ənənəvi hormonal müalicədən fərqli olaraq, xərçəng hüceyrələrinin inkişafında rol oynayan androgen reseptorlarının parçalanmasını təmin edən mexanizm əsasında fəaliyyət göstərir.
Klinik sınaqların birinci mərhələsində gündəlik 420 milliqram dozanın əvvəllər müalicə almış xəstələr üçün qəbuledilən təhlükəsizlik göstəricilərinə malik olduğu müəyyən edilib.
İkinci mərhələdə isə preparatın şişlərə qarşı təsiri qiymətləndirilib. Bəzi xəstələrdə şiş ocaqlarının kiçildiyi, ağrıların azaldığı və prostat xərçənginin izlənməsində istifadə olunan PSA göstəricisinin aşağı düşdüyü müşahidə edilib.
Ən nəzərəçarpan nəticələr androgen reseptorlarında T878 və H875 mutasiyaları olan xəstələrdə qeydə alınıb.
Alimlərin fikrincə, bu nəticələr gələcəkdə şişlərin genetik xüsusiyyətlərinə uyğun daha fərdi müalicə üsullarının hazırlanmasına imkan yarada bilər.
