Sumqayıt şəhərində keçirilən Regional 1-ci Sumqayıt Pediatrik Forum, pediatriya sahəsində müasir inkişafın və problemlərin müzakirəsi üçün mühüm bir platforma oldu.
SEM Academy təşkilatçılığı və Azərbaycan Pediatriya Cəmiyyətinin dəstəyi ilə baş tutan tədbirdə, Sumqayıt şəhəri , Abşeron və Xızı, rayonlarını əhatə edən 150-dən çox pediatr iştirak edib.
Forumun əsas məqsədi, pediatrların bir araya gələrək, sahədəki aktual problemləri, pediatriyanın inkişafını, davamlı təhsilini, yeni diaqnostik və müalicə üsullarını öyrənmək və gələcəkdə elmi tədqiqatlara dəstək olmaq idi. Forumda həmçinin elmi-praktik əlaqələrin qurulması, təlimlər, kurslar, simpozium və konfransların keçirilməsi mövzuları müzakirə olundu.
Həkim pediatr, 1-ci Sumqayıt Pediatrik Forum-un təşkilatçı sədri Bəxtiyar Nağıyev, Azərbaycan Pediatriya Cəmiyyətinin sədri Əli Quliyev, Amerika Ürək Assosiasiyasının Azərbaycandakı Rəsmi təlim mərkəzi Medic School Training Center koordinatoru həkim Mətin Mahmudov çıxış edərək form haqqında ətraflı məlumat verdilər.
Tədbirdə Deputat Müşfiq Məmmədli, TƏBİB-in Təlim və Tədqiqatlar departamentinin rəhbəri Teymur Mirzəbəyli, Sumqayıt Tibb İdarəsinin direktoru Elnur Azadxanov, Respublika Təcili və Təxirəsalınmaz Tibbi Yardım PHŞ rəis müavini Ramin Tahirzadə və digər fəxri qonaqlar iştirak etdi. Aparıcı mütəxəssislərin iştirakı ilə Sumqayıtda pediatriyanın aktual mövzuları geniş müzakirə olundu.
Forumun nəticələri Sumqayıt və ətraf regionların pediatrik xidmətlərinin keyfiyyətinin artırılmasına yönəlmiş mühüm addımlar atılacağını göstərdi. Bu cür tədbirlər, pediatrların peşəkar inkişafı və sağlamlıq xidmətlərinin keyfiyyətinin artırılması istiqamətində əhəmiyyətli töhfə verəcək.
