"Bayden Ukraynaya yardım üçün "Yerlə göyü birləşdirməyi" tapşırıb..."

"Ukrayna bu ölkənin qələbəsinin öz siyasi irsinin bir hissəsini görmək istəyən Co Bayden üçün başlıca prioritetdir..."

ABŞ Milli Təhlükəsizlik Şurası Baydenlə Zelenskinin qarşıdakı görüşü haqqında
 
Ağ Ev Ukrayna prezidenti Vladimir Zelenskinin "Qələbə planı"nın məzmunu ilə hələ tanış deyil, lakin ABŞ prezidenti Co Bayden Kiyevə yardım üçün "Yerlə göyü birləşdirməyi" tapşırıb.
 
Den.az xəbər verir ki, bu barədə ABŞ Milli Təhlükəsizlik Şurasının Avropa məsələləri üzrə direktoru Maykl Karpenter "Amerikanın səsi"nə müsahibəsində deyib.
 
Onun sözlərinə görə, Ağ Ev bu planın prezentasiyasını səbirsizliklə gözləyir və Bayden administrasiyasının son dörd aylıq fəaliyyəti müddətində Kiyevlə strateji məqsədləri razılaşdırmaq istəyir.
 
Karpenter deyib ki, Ukrayna bu ölkənin qələbəsini öz siyasi irsinin bir hissəsini görmək istəyən Co Bayden üçün başlıca prioritetdir.
 
"Biz ukraynalı tərəfdaşlarımızla bütün məsələlər barəsində daimi təmaslardayıq. Lakin mən belə anlayıram ki, konkret bu halda prezident Zelenski buraya gəlib öz planı barədə prezident Baydeni şəxsən tanış etmək istəyir. Ona görə də biz bu planla tanış deyilik, amma prezidentlərin bu barədə tezliklə danışmaq, həmçinin bu administrasiyanın fəaliyyətinin sonunadək oz strateji məqsədlərini razılaşdırmaq imkanı olacaq və bu, çox vacibdir", - Karpenter deyib.
 
O, vurğulayıb ki, Bayden Ukraynaya dəstək verməkdə və onu prezidentlik müddətinin sonunadək ən güclü mövqeyə gətirməkdə tam qətiyyətlidir.
 
"O, Ukraynaya bütün yardımların, xüsusilə hərbi yardımı göstərilməsinə, habelə aprel ayında əlavə maliyyələşdirmə barədə qanun layihəsinin bir hissəsi olan energetika təhlükəsizliyində yardım göstərilməsinə və bunu imkan daxilində tez bir zamanda edilməsinə əmin olmaq üçün Yerlə göyü birləşdirməyi tapşırıb. Bu, onun göstərişləridir və biz onları icra edirik", - Ağ Ev nümayəndəsi vurğulayıb.