"Kreml nə həddən artıq güclənməli, nə də çox zəifləməlidir" - ABŞ və Çinin İLGİNC Rusiya PLANI

"Hazırda Moskva üçün ən böyük təhlükə Çindən asılılığını daha da dərinləşdirməsidir. Təkcə Putin deyil, bütün ruslar bu barədə düşünməlidir". Bunu ABŞ Prezidentinin milli təhlükəsizlik üzrə keçmiş köməkçisi Con Bolton deyib. O bildirib ki, ABŞ-ın maraqlarına əsaslanaraq, Rusiyanın Putindən sonra çox zəif olacağı ehtimalını nəzərə almalıyıq: "İndi təsəvvür etmək çətindir, amma parçalanma, hətta bəzi torpaqların Çin tərəfindən birbaşa ilhaqı ola bilər. Putindən sonra Çin Rusiyanın Asiya hissəsində qeyri-məhdud fəaliyyət azadlığına malik olacaq”, - deyə Bolton vurğulayıb.

Bəs görəsən, Boltonun fikirlərində həıqiqət varmı? Ümumiyyətlə, Çini Rusiya üçün təhlükə hesab edə bilərikmi?

Mövzunu "Den.az"a şərh edən politoloq Oqtay Qasımov bildirib ki, Boltonun fikirləri düşünmək üçün müəyyən əsaslar verir:

"Amma eyni zamanda nəzərə almaq lazımdır ki, Rusiya ilə bağlı ABŞ-ın, kollektiv Qərbin və Çinin öz maraqları mövcuddur. Hər iki tərəfin marağı ondan ibarətdir ki, Rusiya qlobal gücə çevrilməsin. Ukrayna müharibəsinin gedişindən də görünən odur ki, Rusiya xeyli dərəcədə zəiflədilib. Amma onun dağılmasına, tamamilə gücdən düşməsinə maraq göstərilmir. Yəni ABŞ-ın məqsədi Rusiyanı xeyli dərəcədə zəiflətməklə gələcəkdə Çinin güclənməsinin qarşısında bir maneə kimi ondan istifadə etməkdir. Rusiya nə həddən artıq güclənməli, nə də çox zəiflədilməlidir. Çinin marağı ondan ibarətdir ki, zəifləyən Rusiya daha çox ondan asılı olsun. Təsadüfi deyil ki, son illər Çin və Rusiya arasında münasibətlər kifayət qədər dərinləşib. Ukrayna savaşı Rusiyaya ciddi şəkildə problem yaradaraq Çinin güclənməsinə və qlobal səviyyədə rolunun artmasına səbəb olub. Beləcə bir çox məsələlərdə Rusiya Çindən müəyyən qədər asılılığa düşüb. Çinin Rusiyanın bəzi ərazilərini gələcəkdə ilhaq edəcəyi ilə bağlı səsləndirilən fikirlər uzun müddətdən bəri danışılır. Nəzərə almaq lazımdır ki, Çində Rusiyanın Sibir və Tayqa ərazilərini ilhaq etmək istəıyən siyasi düşüncəli şəxslər kifayət qədərdir. Təsadüfi deyil ki, Ukrayna müharibəsi başlayandan sonra Çin televiziyalarından birində Rusiyanın parçalanmış xəritəsi nümayiş etdirilib və orada həmin ərazilərin bir hissəsi Çinə birləşdirimiş formada göstərilib. Bu baxımdan Çin gələcəkdə Rusiya üçün təhlükəyə çevrilə bilər".

Günəş Fərəh,
Den.az