Bu gün dünyanın güclü orduları sırasında qərarlaşan Azərbaycan Silahlı Qüvvələrinin yaranmasından 106 il ötür. Ulu Öndərin hakimiyyəti dövründə formalaşdırılan Milli Ordumuzun keçdiyi döyüş yolunun zirvəsində Vətən müharibəsində qazanılan möhtəşəm Qarabağ Zəfəri dayanır. Qəhrəman zabit və əsgərlərimiz Müzəffər Ali Baş Komandan İlham Əliyevin sərkərdəliyi ilə cəmi 44 gündə 30 illik işğala son qoyaraq Azərbaycanı qalib ölkəyə çevirdi.
Ötən ilin sentyabrında Qarabağda keçirilən antiterror əməliyyatları nəticəsində suverenliyimiz və ərazi bütövlüyümüz tam bərpa olundu. Bütün bunlar göstərir ki, Azərbaycan Ordusu qarşıya qoyulan bütün döyüş tapşırıqlarını icra etməyə qadirdir. Hazırda Silahlı Qüvvələrin modernləşməsi istiqamətində aparılan genişmiqyaslı islahatlar sayəsində ordumuzun gücü və peşəkarlığı artmaqda davam edir.
1918-ci il iyunun 26-da Azərbaycan Xalq Cümhuriyyəti Nazirlər Şurasının qərarı ilə yaradılan ilk müntəzəm hərbi hissə – əlahiddə Azərbaycan korpusu elə həmin il avqustun 1-də Azərbaycanın Hərb Nazirliyinə çevrildi. Görkəmli hərbi xadimlər - Xosrov bəy Sultanov, Səməd bəy Mehmandarov, Əlağa Şıxlinski Milli Ordumuzun formalaşmasında və döyüş qabiliyyətinin yüksəldilməsində əvəzsiz xidmətlər göstərdilər.
Müasir Milli Ordunun şərəfli tarixi isə xalqımızın böyük oğlu Heydər Əliyevin adı ilə bağlıdır. Hələ 1971-ci il iyunun 20-də Cəmşid Naxçıvanski adına ixtisaslaşdırılmış hərbi məktəbin yaradılması, azərbaycanlı gənclərin SSRİ-nin qabaqcıl hərbi məktəblərinə təhsil almağa göndərilməsi bunun bariz sübutu sayıla bilər. Azərbaycan Silahlı Qüvvələrinin formalaşmasında Cəmşid Naxçıvanski adına Hərbi Liseyin yetişdirdiyi milli zabit kadrlarının müstəsna rolu olub. Onlar istər Aprel döyüşlərində, istərsə də Vətən müharibəsində və Qarabağda keçirilən antiterror tədbirlərində bir çox qəhrəmanlıq nümunələri göstəriblər.
Respublikada ordu quruculuğu prosesi Prezident İlham Əliyevin hakimiyyəti dövründə keyfiyyətcə yeni mərhələyə qədəm qoydu. Hərbçilərin peşəkarlığının artırılması, şəxsi heyətin döyüş ruhunun, mənəvi-psixoloji hazırlığının yüksəldilməsi, ordumuzun ən müasir silah və texnika ilə təchizatı istiqamətində təxirəsalınmaz təbirlər görüldü. Azərbaycan Silahlı Qüvvələri ildən-ilə güclənərək regionun ən qüdrətli ordusuna çevrildi.
Silahlı Qüvvələrin yaradılmasının 106 illiyi münasibətilə Respublikanın bütün bölgələrində silsilə tədbirlər keçirilir. Bu münasibətlə Sumqayıt şəhər İcra Hakimiyyətinin təşkilatçılığı və Müdafiə Nazirliyinin Hərbi Orkestrinin müşayiəti ilə möhtəşəm hərbi parad təşkil olunub.
Paradı Sumqayıt şəhər İcra Hakimiyyəti başçısının birinci müavini Teymur Səmədov, müavin Akif Quliyev, Sumqayıt Şəhər Polis İdarəsinin şəxsi heyət üzrə rəis müavini Anar Əliyev, idarə və müəssisə rəhbərləri, eləcə də şəhər ictimaiyyəti fəxarətlə izləyib.
Hərbi parad Heydər Əliyev Mərkəzindən başlayaraq "Bayraq" muzeyinə qədər davam edib. Azərbaycan ordusunun şəxsi heyəti şəhərin Zülfü Hacıyev, Cəlil Məmmədquluzadə, Sahil və Bulvar küçələrindən keçərək "Şəhidlər ölməz, vətən bölünməz" şüarları ilə ətrafdakılara təsirli anlar yaşadıblar. Paradın möhtəşəmliyini şəhər sakinləri hətta öz mənzillərindən də seyr ediblər.
Paradda zirehli hərbi maşınlar şəxsi heyəti və hərbi orkestri müşayiət edib.
Sonda parad iştirakçıları qarşısında çıxış edən Sumqayıt şəhər İcra Hakimiyyəti başçısının birinci müavini Teymur Səmədov bildirib ki, 106 il öncə yaradılan şanlı ordu bu illər ərzində müxtəlif mərhələlərdən keçərək formalaşıb. Ordunun ən yüksək səviyyədə inkişafı və nizam-intizamı isə müasir Azərbaycanın qurucusu, Ulu Öndər Heydər Əliyevin hakimiyyəti dövrünə təsadüf edir. Bu müqəddəs amalı Prezident İlham Əliyev uğurla davam etdirir. Ordu quruculuğunda həyata keçirilən işlərin nəticəsidir ki, bu gün Azərbaycan ordusu qalibdir və torpaqlarımız düşmən tapdağından tam azad edilib.
Den.az
