"Azərbaycan Ordusu dünyanın ən güclü orduları sırasındadır". Silahlı Qüvvələrin Ali Baş Komandanı Prezident İlham Əliyevin səsləndirdiyi bu fikirləri Azərbaycan ordusu sözün bütrün mənalarında haqq edir. 44 günlük "Vətən Müharibəsi" zamanı şanlı Azərbaycan ordusunun göstərdiyi qəhrəmanlıq bunu bir daha sübuta yetirir. 106 il öncə yaradılan şanlı ordu bu illər ərzində müxtəlif mərhələlərdən keçərək formalaşıb. Ordunun ən yüksək səviyyədə inkişafı və nizam-intizamı isə müasir Azərbaycanın qurucusu, Ulu Öndər Heydər Əliyevin hakimiyyəti dövrünə təsadüf edir. Bu müqəddəs amalı Prezident İlham Əliyev uğurla davam etdirir. Ordu quruculuğunda həyata keçirilən işlərin nəticəsidir ki, bu gün Azərbaycan ordusu qalibdir və torpaqlarımız düşmən tapdağından tam azad edilib.
Silahlı Qüvvələrin yaradılamsının 106 illiyinə həsr edilən "Mənim Qalıb Ordum"adlı tədbirdə məhz ordumuzun keçdiyi inkişaf yolundan və əzmkarlığından söz açılıb.
Sumqayıt Tibb Mərkəzinin və Azərbaycan Vətənpərvərlər İctimai Birliyinin Sumqayıt şəhər Təşkilatının birgə təşkilatçılığı ilə keçirilən və Silahlı Qüvvələr gününə həsr olunan tədbirdə Sumqayıt şəhər İcra Hakimiyyətinin əməkdaşı Fərman Kazımov, Sumqayıt Tibb Mərkəzinin direktor müavini Ramil Qasımov, Azərbaycan Vətənpərvərlər İctimai Birliyinin sədri Elvin Mahmudzadə, XTQ-nin ehtiyatda olan baş giziri, Vətən Müharibəsi qazisi, Azərbaycan Vətənpərvərlər İctimai Birliyinin Sumqayıt şəhər Təşkilatının sədri, Sumqayıt Tibb Mərkəzinin Təhlükəsizlik və Mühafizə bölməsinin müdiri Mahir Məmmədov, eləcə də şəhid ailələri, tibb işçiləri və ictimaiyyət nümayəndələri iştirak ediblər.
Öncə vətən uğrunda canından keçən şəhidlərin əziz xatirəsi bir dəqiqəlik sükutla yad edilib və Azərbaycanın dövlət himni səsləndirilib. Ardınca Azərbaycan ordusunun qəhrəmanlıqlarını əks etdirən videoçarx nümayiş olunub.
Ardınca çıxış edən Sumqayıt Tibb Mərkəzinin direktor müavini Ramil Qasımov bildirib ki, ordu hər bir dövlətin təhlükəsizliyinin qarantıdır. Hazırda müasir dünyamızda baş verənlər onu təsdiqləyir ki, güclü ordusu olmayan dövlətlər müstəqil siyasətlərini həyata keçirməkdə çətinlik çəkirlər. Azərbaycanın müstəqil dövlətçilik tarixində ən böyük nailiyyətlərdən biri müasir dövrdə artıq çox güclü potensiala malik Milli Ordunun yaradılması olub.
Azərbaycan Silahlı Qüvvələrinin yaradılması və inkişafı tarixinə bir daha nəzər yetirmək üçün çıxış edən Sumqayıt şəhər İcra Hakimiyyətinin əməkdaşı Fərman Kazımov bildirib ki, Ali Baş Komandan İlham Əliyevin rəhbərliyi, diqqət və qayğısı nəticəsində Azərbaycan Ordusunun texniki təminatı olduqca yüksək səviyyəyı çatdırılıb. Bu gün Azərbaycan xalqı Silahlı Qüvvələrinə və onun Ali Baş Komandanına inanır, ona güvənir. Azərbaycan Ordusu qurucu babalarımızın bizə əmanət edib getdiyi bu Vətəni, məmləkəti göz bəbəyi kimi qoruyur.
Tədbirdə digər çıxış edənlər də Azərbaycan ordusunun şücaətindən, Vətən Müharibəsi zamanı göstərdikləri qəhrəmanlıqlardan, torpaqlarımızın bütövlüyü üçün canlarını fəda etmələrindən söz açıblar.
Tədbirin təşkilatçılarından olan Azərbaycan Vətənpərvərlər İctimai Birliyinin Sumqayıt şəhər Təşkilatının sədri Mahir Məmmədov xüsusi olaraq Denaz.tv üçün müsahibə verib.
Rəsmi hissə yekunlaşdıqdan sonra tədbir ədəbi-bədii kompazisiyalar və vətənpərvərlik ruhunu aşılayan musiqi nömrələri ilə davam etdirilib.
