Sumqayıtda 14 nömrəli məktəbdən "Zəfər Günü" ilə bağlı möhtəşəm tədbir-VİDEO

Sumqayıt şəhər 14 nömrəli tam orta məktəbin və bu təhsil ocağının müəllimi Sədayə Həmidovanın təşkilatçılığı ilə 8 noyabr "Zəfər Günü"nə həs olunan tədbir keçirilib. 

Şəhərin Heydər Əliyev Mərkəzində keçirilən tədbirdə 14 nömrəli məktəbin rəhbərliyi və pedaqoji kollektivi, Milli Qəhrəman Polad Həşimovun anası Səmayə Həşimova və digər şəhid ailələrinin üzvləri, ziyalılar və ictimaiyyət nümayəndələri iştirak ediblər.
"Bizə Zəfər Yaşadanlar" adlı tədbirdə öncə dövlət himni səsləndirilib və vətən uğrunda canından keçən şəhidlərimizin xatirəsi bir dəqiqəlik sükutla yad edilib.
Öncə tədbirin məqsəd və məramı haqqında məlumat verilib.

Bildirilib ki, tədbirin keçirilməsində əsas məqsəd "Zəfər Günü"nə töhfə vermək və gənc nəslə qəhrəmnlıq salnaməsi yazan şəhidlərimzi tanıtmaqdır. Qeyd olunub ki, ölkənin suverenliyi bu cür vətənpərvər oğulların sayəsində tam bərpa olunub. Belə oğullar hər zaman Azərbaycan xalqının qəlbində yaşayacaq. 
 
Daha sonra şəhid general, Milli Qəhrəman Polad Həşimovun anası Səmayə Həşimova çıxış edərək tədbirin təşkilatçılarına təşəkkürünü bildirib.  Qeyd edib ki, Azərbaycan xalqının əzmi və iradəsi, iqtisadi gücü, müasir ordu quruculuğu ölkənin İkinci Qarabağ müharibəsindəki qələbəsini təmin edən mühüm amillər oldu. Bu gün isə şanlı Azərbaycan bayrağı Şuşada, Xankəndidə və işğaldan azad edilən digər ərazilərimizdə dalğalanır. Odur ki, bu zəfəri bizə yaşadanlara hər zaman borclu olmalı və qarşılarında baş əyməliyik.
 
Tədbirdə çıxış edən Sumqayıt Təhsil Sektorunun müdiri İman Ağayev də Zəfər Günü ilə bağlı təəssüratlarını bölüşüb. Bildirib ki, Azərbaycan xalqının və dövlətinin qüdrətinin rəmzinə çevrilmiş bu möhtəşəm Zəfərin tarixi əhəmiyyəti bir əsrin hüdudlarına sığmır. 44 günlük Vətən müharibəsi nəticəsində Azərbaycan torpaqlarının 30 illik işğalına son qoyulması, dövlətimizin ərazi bütövlüyünün təmin edilməsi ilə birlikdə, son iki yüz ilə yaxın dövrdə Azərbaycan xalqına çoxsaylı milli fəlakətlər gətirən erməni şovinizminə sarsıdıcı zərbə endirilmiş və xalqımızın tarixi taleyi ilə bağlı olan son dərəcə mühüm bir məsələ həll edilmişdir.
 
Sumqayıt şəhər İcra Hakimiyyətinin əməkdaşı Mehriban Nəcəfova çıxış edərək bildirib ki, Azərbaycanın Silahlı Qüvvələri ötən il sentyabrın 27-dən noyabrın 10-dək davam edən müharibədə Müzəffər Ali Baş Komandan İlham Əliyevin rəhbərliyi ilə bütün döyüş əməliyyatlarını yüksək səviyyədə həyata keçirməklə mənfur düşməni diz çökdürdü, şanlı Zəfər qazandı və tarixi ədaləti, ölkəmizin ərazi bütövlüyünü bərpa etdi. Ötən hər gün bizi Vətən müharibəsindən zaman etibarilə uzaqlaşdırsa da, hərbçilərimizin şücaəti, canı, qanı bahasına qazanılan bu qələbə hər bir azərbaycanlı üçün son dərəcə əziz və qiymətlidir.

Çıxışlardan sonra məktəbin şagirdlərinin vətənpərvərlik ruhunda hazırladıqları səhnəciklər, musiqi nömrələri və şeirlər təqdim olunub.