Sabah ilk çərşənbədir

Sabah Novruzun ilk çərşənbəsidir.

Den.az xəbər verir ki, fevral ayının 25-i ilin ilk çərşənbəsi - Su çərşənbəsi qeyd olunacaq.
Su çərşənbəsi ilə Novruz bayramı üçün hazırlıqlar başlayır. İnanclara görə Tanrı suyu ilk olaraq yaratdığı üçün birinci çərşənbə kimi su çərşənbəsi qeyd edilir. Bəzi mənbələrdə ona "əzəli çərşənbə", "gül çərşənbə" də deyirlər. Bu çərşənbədə suyun dirilməsi özünü göstərir. Qədim inanclara görə, bu çərşənbə suya tapınma inancı ilə başlayır. İnanca görə "təzə su", yəni səhər dan yeri sökülməmiş götürülən köpüklü ağ su min bir dərdin dərmanı sayılır.

Yaz fəslinin gəlişini xəbər verən Novruz bayramı ilin başlanğıcı kimi də qəbul edilir. Məhz buna görə də insanlar sudan onun kimi şəffaf və gözəl bir ilin keçməsini arzulaya bilərlər. İlk tonqalın su çərşənbəsində yandırılması buzların əriməsi, artıq qışın arxada qalmasının göstəricisidir.

Novruz bayramına gedən dörd çərşənbədən birincisi olan Su çərşənbəsi suyun təmizliyi, həyat mənbəyi olması ilə əlaqələndirilir. İnanclara görə suyun oyanması, torpağa dirilik gətirməsi və yazın gəlişinin ilk işarəsi hesab edilir. İnsanlar sübh tezdən suya gedər, onu təzələyər və su ilə bağlı adətlər icra edərlər.

Su çərşənbəsində adətə görə, evlərdə su ilə bağlı müxtəlif şənliklər keçirilir. İnsanlar bir-birinə su çiləyər, bulaq başına gedər və niyyət edib su içərlər. Həmçinin, bu çərşənbədə suyun bolluğu və təmizliyi firavanlıq rəmzi sayılır. Su çərşənbəsi Novruzun yaxınlaşmasını bildirən ilk çərşənbə olduğu üçün xüsusi önəm daşıyır.