Nəqliyyat sistemi yenilənən Fatmayı kəndindən REPORTAJ: Sakinlər nə deyir? - VİDEO

Azərbaycan dövləti üçün xalqın rifah halının və sosial şəraitinin yaxşılaşdırılması prioritet təşkil edir. Bunun bariz nümunəsini Abşeron rayon Fatmayı kəndində görmək mümkündür. Bir müddət əvvələ qədər köhnə və komfortsuz avtobuslarla mənzil başına çatmağa çalışan kənd sakinləri indi ekspress nəqliyyat vasitələrinin verdiyi zövqün dadını çıxarırlar.

Qeyd edək ki, Azərbaycan Yerüstü Nəqliyyat Agentliyi tərəfindən Bakı, Sumqayıt və Xırdalan kimi iri şəhərlər üçün nəzərdə tutulan komfortlu, geniş və səliqəli ekspress avtobusların məhz Fatmayı kəndində də vətəndaşların istifadəsinə verilməsi Abşeron Rayon İcra Hakimiyyətinin təşəbbüsü ilə baş tutub.

Müasir tipli dayanacaqlar, avtobusların ərazidə hərəkət etdiyini göstərən nişanlar, bir sözlə vətəndaşların komfortu üçün lazım olan bütün infrastruktur məhz Fatmayı kəndində mövcuddur. Təbii ki, bu işlərin həyata keçirilməsində Fatmayı Bələdiyyəsinin rolu da danılmazdır. Görülən işlərin nəticəsidir ki, kənd sakinləri öz razılıqlarını ürəklə dilə gətirirlər.

Təbii ki, ölkədə nəqliyyat infrastrukturunun yenidən qurulması istiqamətində bir çox işlər görülür. Köhnə avtobus parklarının yenilənməsi, sakinlərin rahat, təhlükəsiz və komfortlu avtobuslarla mənzil başına çatmasının təmin olunması aidiyyatı qurumlar üçün prioritet təşkil edir. Abşeron Rayonu Fatmayı kəndində görülən işləri də bu istiqamətdə atılan addımların tərkib hissəsi kimi dəyərləndirmək mümkündür.