Tərbiyəçi-müəllimlər üçün keçiriləcək diaqnostik qiymətləndirmənin əsas məqsədi nədir?-AÇIQLAMA

Məktəb müəllimləri üçün keçirilən sertifikasiya imtahanı onu göstərdi ki, Azərbaycan təhsil sistemində nə qədər boşluq var və bu baxımdan da təhsil sisteminin özəyi olan məktəbəqədər təhsil müəssisələrində də sertifikasiya imtahanının keçirilməsi vacibdir.

"Den.az" xəbər verir ki, bu sözləri Məktəbəqədər təhsil sahəsi üzrə təlimçi-müəllim Ayəddin Ələskərli bildirib.

Bu gün 5000 mindən çox diplomsuz və qeyri -ixtisaslı tərbiyəçi-müəllimlər var ki, məktəbəqədər təhsil müəssisələrində övladlarımıza təlim-tərbiyə verir.Heç bir valideyn övladını müxtəlif yollarla diplom almış və ya diplomsuz müəllimlərə əmanət etmək istəməz. Buna görə də həmin müəllimlər daha çox çalışmalıdır ki, uğurlu nəticə toplayaraq cəmiyyətin onlara qarşı olan fikirini dəyişsinlər və təhsil nüfuzunu qorusunlar. Bir sözlə sertfikasiya imtahanı tərbiyəçi-müəllimlərin özlərini sübut etmək üçün bir şansdır.

Təlimçi -müəllim həmçinin vurğulayıb ki, məktəbəqədər müəssisələrinin Elm və Təhsil Nazirliyinin  tabeliyinə verilməsindən sonra məktəbəqədər təhsil müəssisələrində müsbət irəliləyişlər var. Bu günə qədər 3000 min nəfərdən  çox tərbiyəçi-müəllim  təlimlərə cəlb edilib və ölkədə 2 dəfə tərbiyəçi-müəllim və bağça müdirlərinin işə qəbul imtahanı keçirilib. 500 nəfərdən çox namizəd  işlə təmin olunub.

Bu gün dövrün tələbi ondan ibarətdir ki, müəllim daim öz üzərində çalışmalı, axtarmalı və yeniliklərə açıq olmalıdır .

Yaxın zamanda keçiriləcək tərbiyəçi-müəllimlərin  diaqnostik qiymətləndirilməsinin əhəmiyyətini də vurğulayan təlimçi-müəllim Ayəddin Ələskərli bildirib ki,  diaqnostik qiymətləndirmənin əsas  məqsədi sertifikasiya imtahanına hazırlıq və
tərbiyəçi-müəllimlərin təlim ehtiyaclarının müəyyən edilməsidir. Diaqnostik qiymətləndirmə imtahanının nəticəsi əmək haqqlarına bir mənalı şəkildə təsir göstərməyəcək. Yalnız müddətsiz müqavilə ilə işləyən tərbiyəçi-müəllimlərin,metodistlərin, müdir və ya digər vəzifəsi həvalə olunan tərbiyəçi-müəllimlərin imtahanda iştirakı nəzərdə tutulur.
Yaşı 65 olan tərbiyəçi-müəllimlərin imtahanda iştirakı könüllüdür.

Sonda təlimçi-müəllim bütün namizədlərə uğurlar arzulayıb.


Şahnaz Əliyeva
Den.az