Meksikada “Xalisco Yeni Nəsil Karteli”nin başçısı Nemesio Oseqera Servantesin xüsusi əməliyyat zamanı öldürülməsindən sonra zorakılıq dalğası baş qaldırıb. Associated Press (AP) xəbər verir ki, hadisələr nəticəsində azı 14 nəfər həyatını itirib.
Qurbanlar arasında Meksika Milli Qvardiyasının yeddi əməkdaşı da var. Ölüm halları Xalisco, Michoakan və Quanaxuato ştatlarında qeydə alınıb.
Meksika Müdafiə Nazirliyi bildirib ki, əməliyyatın məqsədi Oseqeranın saxlanılması olub. Lakin Qvadalaxaranın cənub-qərbində hərbçilərlə kartel üzvləri arasında atışma baş verib. Yaralanan Oseqera helikopterlə Mexikoya aparılarkən yolda ölüb.
Kartel üzvləri buna cavab olaraq yolları bağlayıb və nəqliyyat vasitələrini yandırıblar. Meksikanın ikinci ən böyük şəhəri olan Qvadalaxara faktiki olaraq blokadaya alınıb. Turistlər arasında populyar olan Puerto-Valyarta şəhərində də yandırma halları qeydə alınıb.
Meksika prezidenti Klaudiya Şeynbaum vətəndaşları sakitliyə çağırıb. Hakimiyyət ölkənin 20 ştatında qurulan 250-dən çox yol baryerinin böyük hissəsinin aradan qaldırıldığını açıqlayıb.
Ağ Ev sözçüsü Kerolayn Levit isə ABŞ-ın əməliyyat üçün kəşfiyyat məlumatı təqdim etdiyini bildirib. Vaşinqton daha əvvəl karteli xarici terror təşkilatları siyahısına daxil etmiş və Oseqeranın tutulmasına gətirib çıxaracaq məlumat üçün 15 milyon dollar mükafat təklif etmişdi.
2009-cu ildə yaradılan bu kartel Meksikanın ən güclü və sürətlə böyüyən cinayət şəbəkələrindən biri hesab olunurdu. ABŞ-a fentanil, kokain, heroin və metamfetamin daşınmasında əsas rol oynayıb, həmçinin minalardan və pilotsuz aparatlarla partlayıcı atılmasından istifadə edən ilk qruplardan biri kimi tanınıb.
