ABŞ-nin keçmiş dövlət katibi Hillari Klinton ölkəsinin İranla müharibə zamanı silah və sursat ehtiyatlarının ciddi şəkildə azalması səbəbindən gözlənilməz yeni təhlükəyə lazımi cavab verməkdə çətinlik çəkə biləcəyini bildirib.
C-SPAN-a müsahibəsində Klinton deyib:
“Biz çətin vəziyyətdəyik, çünki gözlənilməz təhlükəyə lazımi şəkildə cavab verə bilməyə bilərik”.
Onun sözlərinə görə, Vaşinqton İranla qarşıdurma zamanı çoxlu sursat istifadə edib, eyni zamanda Fars körfəzindəki müttəfiqlərinə də böyük həcmdə silah göndərib.
ABŞ-də sursat ehtiyatları ilə bağlı narahatlığın real əsası da var. CSIS-in iyulun 31-də yayımladığı təhlilə görə, İranla müharibə ABŞ-nin əsas raket ehtiyatlarını ciddi şəkildə azaldıb. Təşkilat Patriot, THAAD və PrSM ehtiyatlarının təxminən yarısının, Tomahawk, JASSM və bəzi Standard raketlərinin isə təxminən üçdə birinin istifadə edildiyini bildirir.
CSIS-in daha yeni qiymətləndirməsində isə Patriot raketlərinin ehtiyatının artıq 1000-dən aşağı düşdüyü, THAAD ehtiyatlarının isə təxminən 250 ədəd olduğu qeyd edilir. Analitiklər əsas riskin İranla müharibənin davamından çox, gələcəkdə Çin, Rusiya və ya digər böyük rəqiblə mümkün qarşıdurma üçün yaranan boşluq olduğunu vurğulayırlar.
Ekspertlər bildirirlər ki, bəzi raket növlərinin ehtiyatını əvvəlki səviyyəyə qaytarmaq bir neçə il çəkə bilər.
