Bakıda modelyerin atasını keçmiş polis öldürübmüş - MƏHKƏMƏ

Bakı Ağır Cinayətlər Məhkəməsində tanınmış modelyer Elnarə Bəkirovanın atasının qətlində təqsirləndirilən Mustafa Zeynalov və Namiq Əliyevin cinayət işi üzrə məhkəmə prosesi başlayıb.

Den.az xəbər verir ki, hakim Mahirə Kərimovanın sədrliyi ilə keçirilən prosesdə dövlət tərəfindən təyin edilən vəkillərin proses üzrə fəaliyyətinə xitam verilib. 

Buna səbəb ötən prosesdə təqsirləndirilən şəxslərin dövlət tərəfindən verilən vəkillərə imtina etməsi olub. Onların fərdi vəkillərinin məlumatları dəqiqləşdirilib.

Cinayət işinin məhkəmə baxışına verilməsi üçün hakimlər müşavirəyə yollanıb. 

Elə bu zaman zalda tərəflər arasında münaqişə düşüb. 

Zərərçəkmiş şəxs Elnarə Bəkirova təqsirləndirilən şəxslərin günbəgün cəza çəkəcəklərini deyib:

“Sizi orda çürüdəcəm. 20 il həbsdə qalacaqsınız. Günbəgün çəkəcəksiniz cəzanızı. Atamın başına sən idin vuran? Siz orda öləcəksiniz. Şərəfsizlər. Sizin uşaqlarınızı gözünüzün qabağında öldürəcəklər”.

Müşavirənin nəticəsi ilə prosesin məhkəmə baxışı noyabrın 6-da davam etdiriləcək.

Anket məlumatlarında təqsirləndirilən şəxs Mustafa Zeynalovun əvvəllər polis orqanlarında müstəntiq vəzifəsində çalışdığı qeyd olunub. O, çalışdığı müddətdə hüquq-mühafizə orqanlarında törətdiyi cinayətə görə 5 il azadlıqdan məhrum edilib.

Xatırladaq ki, amansızlıqla qətlə yetirilən 69 yaşlı Kamran Bəkirov biznesmen olub. O, rəssam-modelyer Elnarə Bəkirovanın atasıdır.

Hadisə bu ilin aprelin 6-da Bakının Sabunçu rayonu, Nardaran qəsəbəsi, Ləhic bağları yaşayış massivində qeydə alınıb.
 
Belə ki, 1954-cü il təvəllüdlü Kamran Bəkirovun üzərində olan 300 min manatla itkin düşməsi barədə polisə məlumat daxil olub.

Polis tərəfindən keçirilən axtarış tədbirləri nəticəsində həmin şəxsin öldürülməsi və meyitinin gizlədilməsi məlum olub.

Cinayət əməlini törətməkdə şübhəli bilinənlər - əvvəllər məhkum olunan 1953-cü il təvəllüdlü Mustafa Zeynalov, 1984-cü il təvəllüdlü Namiq Əliyev saxlanılıb.

İstintaqda məlum olub ki, Mustafa Zeynalov və qohumu Namiq Əliyevlə əlbir olaraq üzərində olan külli miqdarda pul vəsaitini ələ keçirmək məqsədilə Kamran Bəkirovu xüsusi amansızlıqla qəsdən öldürməsi, daha sonra cinayətin izlərini gizlətmək məqsədilə meyiti su quyusuna atmaları və həmin pulu ələ keçirmələrinə əsaslı şübhələr müəyyən edilib.

Mustafa Zeynalov və Namiq Əliyevə Cinayət Məcəlləsinin 120.2.1, 120.2.4, 120.2.6, 120.2.11 (bir qrup şəxs tərəfindən başqa cinayəti gizlətmək və quldurluqla əlaqədar xüsusi amansızlıqla adam öldürmə), 181.3.2 və 181.3.3-cü (külli miqdarda əmlak əldə etmək və zərərçəkmiş şəxsin sağlamlığına ağır zərər vurulmaqla quldurluq) maddələrilə ittiham elan edilib.