Mürəkkəb bişirmə prosesi və uzun inqrediyent siyahısı olmadan şirin desert hazırlamaq istəyənlər üçün bu resept uyğun seçim ola bilər. Hazır desert zərif, ipək kimi yumşaq və kreməbənzər teksturaya malik olur.
Desertin əsas sirri qarğıdalı nişastasıdır. Məhz nişasta qaymaq və jelatin istifadə edilmədən qarışığa yüngül pudinq konsistensiyası verir.
Lazım olan ərzaqlar
- 500 ml süd;
- 100 qram şəkər;
- 2 xörək qaşığı qarğıdalı nişastası;
- 1 çay qaşığı vanil ekstraktı və ya 10 qram vanilli şəkər;
- bir çimdik duz.
Bəzəmək üçün sürtgəcdən keçirilmiş şokolad, təzə giləmeyvə, nanə yarpaqları və ya karamel sousundan istifadə etmək olar.
Hazırlanma qaydası
Qazana şəkər, qarğıdalı nişastası və bir çimdik duz əlavə edin. Südü tədricən tökərək çırpıcı ilə qarışdırın ki, topaqlar yaranmasın.
Qarışığı orta odda, xüsusilə qazanın dibini fasiləsiz qarışdıraraq bişirin. Təxminən 5–7 dəqiqədən sonra kütlə qatılaşaraq hamar konsistensiya alacaq.
Qazanı oddan götürün, vanil əlavə edib yaxşıca qarışdırın. Hazır qarışığı desert qablarına, kiçik şüşə bankalara və ya keramika formalara bölüşdürün.
Arzuya görə deserti 180 dərəcə temperaturda 8–10 dəqiqə sobada saxlayaraq üzərində yüngül qızılı qabıq yaratmaq mümkündür.
Desert tam soyuduqdan sonra səthinə toxunacaq şəkildə qida plyonkası ilə örtün və ən azı iki saat soyuducuda saxlayın.
Süfrəyə verməzdən əvvəl üzərini şokolad, giləmeyvə, nanə yarpaqları və ya karamel sousu ilə bəzəyə bilərsiniz.
