Yay mövsümündən sonra dəri xüsusi qayğıya ehtiyac duya bilər. Günəşin ultrabənövşəyi şüaları dərinin qoruyucu baryerini zəiflədir, nəm itkisini artırır və piqment ləkələrinin yaranmasına səbəb ola bilir.
Bu barədə “Meditsina” klinikasının dermatoloq-kosmetoloqu Yelizaveta Şuxman “Lenta.ru”ya açıqlamasında bildirib.
Mütəxəssisin sözlərinə görə, payızda dəriyə qulluğun əsas məqsədi onu bərpa etmək, soyuq havaya və quruluğa hazırlamaqdır.
“Günəşə uzun müddət məruz qaldıqdan sonra dəri daha quru və həssas ola bilər. Günəş yanığı baş verməsə belə, ultrabənövşəyi şüalar dərinin qoruyucu baryerini zədələyə bilər. Buna görə də payızda ilk növbədə dəridə quruluq, qabıqlanma, dartılma, qıcıqlanma və ya həddindən artıq yağlanma olub-olmadığını qiymətləndirmək lazımdır”, – deyə həkim bildirib.
Dermatoloq qeyd edib ki, payız aylarında dəriyə qulluğun əsasını nəmləndirmə təşkil etməlidir. Soyuq hava, külək, temperatur dəyişiklikləri və istilik sistemlərinin yaratdığı quru hava dərinin daha sürətlə nəm itirməsinə səbəb olur.
Onun sözlərinə görə, gündəlik qulluq vasitələrində qliserin, hialuron turşusu, karbamid, seramidlər, skvalan və lipidlər kimi komponentlərə üstünlük vermək olar.
Dərisi quru olan şəxslərə yumşaq təmizləmədən sonra gündə iki dəfə nəmləndirici krem çəkmək tövsiyə olunur.
Şuxman payızda dərhal güclü təsir göstərən kosmetik prosedurlara başlamağı məsləhət görmür.
“Əgər dəri qabıqlanır, qızarır və ya əvvəllər istifadə olunan kosmetik vasitələrə həssas reaksiya verirsə, əvvəlcə onun qoruyucu baryerini bərpa etmək lazımdır. Yalnız bundan sonra retinoidlər və turşular tədricən qulluq rutinə daxil edilə bilər”, – deyə mütəxəssis vurğulayıb.
Həkim bir neçə qıcıqlandırıcı vasitədən eyni vaxtda istifadə etməməyi tövsiyə edib.
Dermatoloqun sözlərinə görə, payızda da günəşdən qoruyucu krem istifadə etmək vacibdir. Havanın soyuması ultrabənövşəyi şüaların təsirini aradan qaldırmır. Xüsusilə piqment ləkələrinə meyilli olan və aktiv kosmetik komponentlərdən istifadə edən şəxslərə SPF 30 və daha yüksək qoruma faktorlu vasitələr məsləhət görülür.
Dərinin təmizlənməsi də yumşaq olmalıdır. Çox isti sudan və sərt təmizləyici vasitələrdən uzaq durmaq tövsiyə edilir. Üzü yuduqdan sonra güclü dartılma hissi yaranırsa, istifadə olunan məhsulu dəyişmək lazım gələ bilər.
Mütəxəssis bildirib ki, güclü qızartı, şişkinlik, qaşınma, çatlar və səpkilər müşahidə edildikdə dermatoloqa müraciət edilməlidir. Daimi qulluqla aradan qalxmayan quruluq da müəyyən xəstəliklər və ya orqanizmdə bəzi maddələrin çatışmazlığı ilə əlaqəli ola bilər.
Şuxman əlavə edib ki, kifayət qədər su içən şəxslərin yalnız dəriyə görə su qəbulunu xüsusi olaraq artırmasına ehtiyac yoxdur. Dərinin vəziyyəti üçün xaricdən nəmləndirmə daha vacibdir.
“Payızda dərini müxtəlif vasitələrlə yükləmək deyil, onun bərpasına kömək etmək lazımdır. Yumşaq təmizləmə, nəmləndirmə, qoruyucu baryerin bərpası və günəşdən müdafiə əksər insanlar üçün uyğun qulluq üsullarıdır”, – deyə dermatoloq yekunlaşdırıb.
