Vaşinqton və Moskva münasibətləri bu cür həll etmək niyyətindədir - DETALLAR

ABŞ və Rusiya nümayəndə heyətinin Səudiyyədə 5 saata yaxın davam edən görüşü başa çatıb. Tərəflər bir sıra prinsip üzrə razılığa gəlib.

Mövzunu "Den.az"a politoloq Asif Nərimanlı şərh edib. 

- Ukrayna münaqişəsinin həlli üçün danışıqlar qrupunun yaradılması;

- Rusiya-ABŞ münasibətlərində “qıcıqlandırıcı” amilləri aradan qaldırmaq üçün məsləhətləşmə mexanizminin yaradılması;

- Vaşinqton və Moskvadakı səfirliklərin ştatlarının bərpa edilməsi;

- Geosiyasi maraq doğuran məsələlərdə əməkdaşlıq etmək;

- İqtisadi və investisiyalar sahəsində gələcək əməkdaşlıq.

İlkin razılaşmalar üzrə danışıqların davam edəcəyi aydındır. Bu razılaşmadan çıxan nəticələri belə qiymətləndirmək olar:

1. Ukrayna müharibəsi cəbhədən diplomatik müstəviyə keçir: Ukraynanın da yer alacağı danışıqlar qrupunda başqa tərəflərin də iştirakı istisna edilməməlidir, hərçənd, formatın tərkibinin müəyyən edilməsində həlledici qərar ABŞ və Rusiyaya məxsus olacaq;

2. Vaşinqton və Moskva münasibətləri faktiki olaraq bərpa etmək və yarana biləcək problemləri dialoq yolu ilə həll etmək niyyətindədir;

3. Hər iki tərəf təkcə Ukrayna məsələsində yox, Yaxın Şərq və digər coğrafiyalarda da bir-birinin maraqlarını nəzərə alacaq: istisna deyil ki, ABŞ Rusiyadan İran və Çinə qarşı proseslərdə ən azı neytrallığını qorumağı, Vaşinqtonun maraqlarını nəzərə almasını istəyir, qarşılığında Ukraynada güzəştlərin edilməsi mümkün gözləntilərdəndir; eyni zamanda, Rusiyanın geosiyasi müstəvidə “güc olması” qəbul edilə bilər;

4. Rusiyaya qarşı sanksiyaların yumşaldılması addımları atılacaq.
Bu razılaşmaların praktiki müstəvidə nə dərəcədə reallaşacağı bəlli deyil, lakin bununla ABŞ qlobal tərəf kimi Avropanı, yaxud Çini deyil, məhz Rusiyanı tanıyır.

Günəş Fərəh
Den.az