"Trampın komandası Ukrayna müharibəsinin gələn həftə bitə biləcəyini bildirib" - Ağ Evin mətbuat katibi

"Zelenskinin "əlinə oynayacaq kartları" yoxdur və o, sülh danışıqlarında beynəlxalq liderlərlə müzakirələrdən çəkinməlidir..."

Ağ Evin mətbuat katibi Karolin Livittin sözlərinə görə, ABŞ prezidenti Donald Tramp Ukrayna müharibəsinə son qoymaq üçün Rusiya ilə razılığa gəlmək bacarığına tam əmindir.
 
Den.az xəbər verir ki, bu barədə "The Hill" nəşri yazıb.
 
Nəşrinin məlumatına görə, o, münaqişənin artıq gələn həftə sona çata biləcəyini ehtimal edib.
 
"Prezident və komandası bu müharibənin hər iki tərəflə danışıqları davam etdirməyə və münaqişəyə son qoymağa tamamilə fokuslanıb. Prezident əmindir ki, biz bunu bu həftə edə bilərik", -  Livitt jurnalistlərə bildirib.
 
O, həmçinin qeyd edib ki, maliyyə naziri Skott Bessent Ukrayna ilə təbii sərvətlərin hasilatı üzrə təklif edilən razılaşma ilə bağlı müzakirələrdə iştirak edib.
 
"Əsas minerallar məsələsinə gəlincə, bu, prezident üçün mühüm məqamdır, çünki bu, ABŞ vergi ödəyicilərinin pullarını kompensasiya edəcək. Həmçinin, bu, Amerika Birləşmiş Ştatları və Ukrayna xalqı üçün güclü iqtisadi tərəfdaşlıq yaradacaq, eyni zamanda Ukraynanın bu amansız müharibədən sonra bərpasına töhfə verəcək", - Livitt vurğulayıb.
 
Nəşrin xatırlatdığına görə, daha öncə ABŞ prezidenti Donald Tramp bildirib ki, Ukrayna prezidenti Vladimir Zelenskinin "əlinə oynayacaq kartları yoxdur" və o, gələcəkdə sülh danışıqları ilə bağlı beynəlxalq liderlərlə müzakirələrdən çəkinməlidir.
 
Ukrayna müharibəsi- son xəbərlər
 
Bundan öncə Ukrayna Müdafiə Nazirliyi Baş Kəşfiyyat İdarəsi bildirib ki, Rusiya fevralın 24-də, genişmiqyaslı işğalın üçüncü ildönümündə müharibədə "qələbə" elan etməyə hazırlaşır.
 
Səudiyyə Ərəbistanının Ər-Riyad şəhərində Rusiya və ABŞ arasında keçirilən danışıqlardan sonra ABŞ Dövlət Departamenti Ukraynada sülhə doğru "əhəmiyyətli bir irəliləyiş" olduğunu bəyan edib.
 
Bununla yanaşı, ABŞ Dövlət katibi Marko Rubio bildirib ki, Ər-Riyadda Rusiya ilə aparılan danışıqlarda sanksiyaların ləğvi və ya ərazi güzəştləri kimi potensial sülh sazişi detallarına toxunulmayıb. 
 
Onun sözlərinə görə, Vaşinqton Rusiyanın sülhə nail olmaq məsələsində nə dərəcədə ciddi olduğunu öyrənmək üçün birbaşa danışıqlara razılıq verib.