Azərbaycan və Ermənistan artıq de-fakto sülhə nail olub.
Bunu Azərbaycanın xarici işlər naziri Ceyhun Bayramov BMT Baş Assambleyasının 81-ci sessiyasının ümumi debatlarında çıxışı zamanı bildirib.
Nazirin sözlərinə görə, Bakı İrəvana iki ölkənin suverenliyinin və ərazi bütövlüyünün qarşılıqlı tanınması və hörmət edilməsi, eləcə də beynəlxalq hüququn norma və prinsipləri əsasında sülh təklif edib.
Bayramov xatırladıb ki, ötən ilin avqustunda Vaşinqtonda keçirilən sammit zamanı Azərbaycan və Ermənistan liderləri ABŞ Prezidenti Donald Trampın iştirakı ilə Birgə Bəyannamə imzalayıblar. Tərəflər, həmçinin, sülh və dövlətlərarası münasibətlərin qurulması haqqında sazişi paraflayıblar.
“Biz artıq de-fakto sülhə nail olmuşuq”, – deyə Ceyhun Bayramov bildirib.
XİN rəhbərinin sözlərinə görə, Azərbaycan birtərəfli qaydada bir sıra tranzit məhdudiyyətlərini aradan qaldırıb, Ermənistana və Ermənistandan malların daşınmasını asanlaşdırıb, eləcə də iki ölkə arasında ticarət əlaqələri yaranıb. Bayramov Azərbaycanın Ermənistana neft məhsulları da tədarük etdiyini qeyd edib.
Nazir vurğulayıb ki, sülh prosesinin geri dönməzliyini təmin etmək üçün qalan maneənin aradan qaldırılması və artıq paraflanmış ikitərəfli sazişin imzalanması ilə normallaşma prosesinin başa çatdırılması vacibdir.
Bayramov, həmçinin, Azərbaycanın postmünaqişə gündəliyinin yüz minlərlə azərbaycanlının öz evlərinə təhlükəsiz və ləyaqətli şəkildə qayıtması üçün şərait yaradılmasını nəzərdə tutduğunu bildirib. Azərbaycan rəsmiləri 2026-cı ildə də təhlükəsiz və ləyaqətli qayıdış məsələsini ölkənin postmünaqişə siyasətinin istiqamətlərindən biri kimi təqdim ediblər.
