Azərbaycanda uşaq siyasətinin əsası ümummilli lider Heydər Əliyev tərəfindən qoyulub-VİDEO

Ulu öndər Heydər Əliyevin anadan olmasının 100-cü ildönümü Azərbaycanın hər yerində təntənəli şəkildə qeyd edilir. Bu münasibətlə Azərbaycan xalqı öz xilaskarının, müasir müstəqil dövlətimizin memarı ümummilli lider Heydər Əliyevin əziz xatirəsini sonsuz sevgi ilə anır, ulu öndərin Vətən və dövlət qarşısındakı misilsiz xidmətləri minnətdarlıqla xatırlanır.
 Bu sözləri Abşeron-Xızı Regional Təhsil idarəsinin tabeliyində olan Xırdalan şəhər 2 nömrəli körpələr evi-uşaq bağçasının müdiri Fidan Tağızadə "Den.az"-a müsahibəsində bildirib.

Onun sözlərinə görə, bu gün uşaqlarımızın necə tərbiyə almalarından, hansı ideyalara meyillənmələrindən ölkəmizin gələcəyi çox asılıdır. Ona görə də uşaqlara xüsusi diqqət və qayğı hər zaman göstərilməlidir. Əminliklə demək olar ki, bu gün Azərbaycanda uşaqların problemləri dövlətimiz tərəfindən xüsusi diqqət mərkəzində saxlanılır, onların həllinə ciddi nəzarət olunur. Azərbaycanda uşaq siyasətinin əsası ümummilli lider Heydər Əliyev tərəfindən qoyulub. Müstəqil Azərbaycan dövlətinin qurucusu olan ulu öndər uşaqları sonsuz məhəbbətlə sevirdi və onlara böyük qayğı və diqqət göstərirdi. Azərbaycan körpələrinin sağlamlığı, onların yaxşı təhsil və təlim-tərbiyə alması, Vətən və xalq üçün gərəkli övlad kimi böyüməsi ümummilli liderin daim diqqətində olub.