Beynəlxalq Cinayət Tribunalları üzrə Qalıq Mexanizm cümə axşamı Bosniya serbləri ordusunun Baş qərargahının keçmiş komandanı Ratko Mladiçin vaxtından əvvəl azadlığa buraxılması ilə bağlı vəsatətini rədd edib. Bu barədə Avropa mediası məlumat yayıb.
Ömürlük həbs cəzası çəkən 84 yaşlı Mladiç daha əvvəl səhhətinin pisləşməsini əsas gətirərək müvafiq vəsatət təqdim etmişdi.
Məhkəmə qərarında məhkumun “həyatının son mərhələsində” olduğunu qəbul edib və onun vəziyyətini “çox ağır” adlandırıb. Bununla belə, məhkəmə instansiyası bildirib ki, ona yaradılan saxlanma şəraiti “maksimum rahatlığı” təmin edir.
Qurumun qərarında deyilir:
Niderlandda olmayan və başqa yerdə əlçatan olan əlavə müalicə imkanı mövcud deyil.
BMT strukturunda həmçinin qeyd olunub ki, Mladiç ixtisaslı həkimlər, tibb işçiləri və cəzaçəkmə müəssisəsinin əməkdaşları tərəfindən hərtərəfli və humanist müalicə almağa davam edir.
Mladiç artıq iki ildir həbsxana xəstəxanasında saxlanılır. Son bir il yarımdır isə o, yataq xəstəsidir.
Serb Respublikası ordusunun Baş qərargahının keçmiş komandanı 2011-ci il mayın 26-da Serbiyada həbs edilib və həmin dövrdə ölkə hakimiyyəti tərəfindən Haaqaya təhvil verilib.
2017-ci il noyabrın 22-də Haaqa tribunalı onu Bosniya və Herseqovinada 1992-1995-ci illər vətəndaş müharibəsi zamanı törədildiyi iddia olunan hərbi cinayətlərə görə ömürlük həbs cəzasına məhkum edib. Hökm 2021-ci il iyunun 8-də təsdiqlənib.
