Pittsburq Universitetindən olan beynəlxalq tədqiqatçılar qrupu “pis xolesterin” adlandırılan aşağı sıxlıqlı lipoproteinlərin (LDL) səviyyəsini müəyyən edən genetik variantların ilk kompleks məlumat bazasını yaradıb. Bu göstərici infarkt və insult riski ilə birbaşa əlaqəlidir. Tədqiqatın nəticələri Science jurnalında dərc olunub.
Qan damarlarının vəziyyəti ürək və beyin sağlamlığına birbaşa təsir edir. Alimlərin sözlərinə görə, yeni inkişaf problemin genetik səbəblərinə qədər dərinləşməyə imkan verir. Onlar təxminən 17 min LDL reseptorları ilə bağlı mutasiyanı təhlil edərək, bu dəyişikliklərin orqanizmin xolesterin səviyyəsini tənzimləmə qabiliyyətinə təsirini sistemləşdiriblər.
Hazırlanmış məlumat bazası ürək-damar xəstəliklərini erkən mərhələdə, yəni klinik əlamətlər görünmədən və analizlər normal olsa belə proqnozlaşdırmağa imkan yaradır. Alimlərin fikrincə, bu sistemin tətbiqi irsi hiperlipidemiyanın aşkarlanma effektivliyini on dəfə artırır.
Yeni işlənmiş üsul artıq BRCA1 gen mutasiyasına dair testin analoqu adlandırılır — həmin test döş xərçəngi riskini müəyyənləşdirmək üçün istifadə olunur. Eyni prinsiplə, bu texnologiya xolesterin səviyyəsinin artmasına meyilli insanları daha dəqiq müəyyənləşdirməyə və vaxtında profilaktika və ya müalicə seçməyə imkan verəcək.
Tədqiqatçılar qeyd ediblər ki, genetik amillərin əhəmiyyətinə baxmayaraq, həyat tərzi hələ də profilaktikanın əsas elementi olaraq qalır. Onların sözlərinə görə, fastfuddan tədricən imtina və balanslaşdırılmış qidalanmaya keçid damarların və ürəyin sağlam qalmasına kömək edir. Sağlam vərdişlər həmçinin irsiyyətlə bağlı risklərin xəstəliyə çevrilmə ehtimalını azaldır.
