100-dən çox şəhid ana və atası Sumqayıtda toplaşdı-VİDEO

Sumqayıt Dövlət Universitetinin (SDU) Mükəmməllik Mərkəzinin təşəbbüsü ilə “Mənim oğlum qəhrəmandır” layihəsi çərçivəsində Azərbaycanın müxtəlif bölgələrindən gələn 100-dən çox şəhid ana və atalarının tələbələrlə görüşü keçirilib. “Den.az” xəbər verir ki,  görüşdə şəhid ailələrinin cəmiyyətə və tələbələrə örnək olan əzmkarlığı, vətənpərvərlik hissləri və şəhidlərimizin xatirəsinin anılıb. Tədbirin əsas məqsədi tələbələrə qəhrəman övladlar yetişdirən ailələrin dəyərini göstərmək və vətən uğrunda canlarını fəda edən qəhrəmanlarımızı yad etmək olub. 
 
Əvvəlcə Tarixi Zəfər yolumuzun ən uca rütbəsini daşıyanların adının çəkildiyi Sumqayıt Şəhidlər Xiyabanı 1 dəqiqəlik sükutla yadd edilib. Sumqayıt Şəhidlər Xiyabanının ziyarəti ilə başlanan tədbir şəhid yaxınları, dövlət rəsmiləri, ictimai xadimlər və incəsənət nümayəndələrinin iştirakı ilə Sumqayıt Dövlət Universitetində davam etdirilib. Tədbirdə SDU nun rektoru Rüfət Əzizov, Sumayıt Şəhər İcra Hakimiyyəti başçısının birinci müavini Teymur Səmədov, Milli Qəhrəman Polad Həşimovun anası Səmayə Həşimova  çıxış ediblər. Bildirilib ki, qəhrəmanlarımız mənən hər zaman bizimlədir və şəhid ailələri hər kəsə nümunədir. Yaşından, vəzifəsindən, sosial mənşəyindən asılı olmayaraq şəhidlərimizin adı anılanda minnətdarlıq hissi keçirilir. Şəhid ailələri cəmiyyətimizdə istər dövlətimiz, istərsə də, hər bir vətəndaşımız tərəfindən ən böyük diqqətə və hörmətə layiq insanlardır. Çünki ölkəmiz ölkə rəhbərliyinin qüdrətli siyasəti, şəhidlərimizin fədakarlığı ilə bu gün dövrünün ən çiçəkli tarixini yaşayır. Diqqətə çatdırılıb ki, vətən adı gələndə ümumiləşən amallar 44 Günlük Vətən Müharibəsindəki birliyin təcəssümü idi. Qələbəni bizə yaşadanları yetişdirənlər isə qabarlı əlləri, əzabkeş surətləri ilə ali duyğularında qəhrəman övlad sevgisi daşıyan analardır. Gözlərindəki və çiyinlərindəki yükün ağırlığına rəğmən əzəməti və vüqarı ilə hər kəsə nümunə olan şəhid anaları hərzamankı kimi bu tədbirin də ən əsas qonaqlarıdır. Hər şəhid bir Vətən daşıdır və gələcək nəsillər o daşların üzərində yenilməzlik ruhu daşıyacaq. Vurğulanıb ki, bugünkü tədbirdə həm cəmiyyətimizə insan, həm də məhz Vətənə şəhidlər kimi qəhrəmanlar yetişdirən 23 müəllim şəhid anası da iştirtak edir. 
 
4 il ərzində 50-dən çox tədbirlə şəhid əmanətlərinə öz sevgisini bəyan edən “Fire Land Group”un rəhbəri, AYB-nin üzvü Cəlal Qurbanov Xızı, Şəki, Oğuz, Sumqayıt kimi ölkəmizin bütün bölgələrində zaman-zaman belə tədbirlərin keçirləcəyini vurğulayıb.
 
Çıxışlarda şəhid və qazi ailələrinə göstərilən diqqətə görə Prezident İlham Əliyevə, birinci vitse-prezident Mehriban xanım Əliyevaya təşəkkür ifadə olunub. 
 
Vurğulanıb ki, «Cənab Prezidentin Xankəndiyə sancdığı bayrağımız inşallah Zəngəzurda da ucalacaq»  . Və bu tədbirlərin davamı məhz o torpaqlarda olacaq...
 
Anım tədbirinin ardınca şəhidlərimizin adına ehsan süfrəsi açılıb.