Gündəlik gəzintilər və müntəzəm fiziki məşqlər yaşlı insanların sağlamlığını qorumağa və ömür müddətini uzatmağa kömək edə bilər.
Bu barədə həkim-gerontoloq, nevroloq və neyrofizioloq Valeri Novoselov NEWS.ru nəşrinə açıqlamasında bildirib.
Mütəxəssisin sözlərinə görə, fiziki aktivlik yaşlanma prosesini ləngitməyin ən təsirli üsullarından biridir.
Həkim yaşlı insanlara hər gün piyada gəzməyi və müntəzəm idmanla məşğul olmağı tövsiyə edib.
«Yaşlı insanların fiziki sağlamlığını qorumaq və ömrünü uzatmaq üçün gündəlik gəzintilər və hərəkətlilik vacibdir. Həftədə 2–3 dəfə əzələləri gücləndirən məşqlər etmək tövsiyə olunur. Bunun üçün qantellərdən, ştanqdan, elastik idman lentlərindən və trenajorlardan istifadə etmək olar», – deyə Novoselov bildirib.
Onun sözlərinə görə, hərəkətli həyat tərzi yaşlanmanın mənfi təsirlərini azaltmağa və orqanizmin funksiyalarını daha uzun müddət qorumağa kömək edir.
Mütəxəssis həmçinin sosial fəallığın əhəmiyyətini vurğulayıb.
«Cəmiyyət həyatında fəal iştirak edən, insanlarla ünsiyyətdə olan və aktiv həyat tərzi sürən şəxslər orta hesabla daha uzun yaşayırlar», – deyə həkim qeyd edib.
Novoselov yaşlı insanlara mümkün qədər hərəkətli olmağı və fiziki fəaliyyətlərini gündəlik həyatlarının bir hissəsinə çevirməyi məsləhət görüb.
Qeyd edək ki, fiziki məşqlərin intensivliyi insanın yaşına, sağlamlıq vəziyyətinə və fiziki imkanlarına uyğun seçilməlidir.
