Sumqayıtda şəhid Saleh Nuriyevin anım mərasimi keçirilib-VİDEO

Şəhidlik ən uca zirvədir və bu ali məqama çatmaq heç də hər kəsə nəsib olmur. Çünki şəhidlər öz qanları bahasına vətəni qoruyan, onun bütövlüyünü təmin edən insanlardır. Məhz buna görə də, şəhidlər heç zaman ölmür, əbədi qəlblərdə məskən salırlar. Vətən uğrunda canını fəda edən şəhidlərimizdən biri də Saleh Səxavət oğlu Nuriyevdir. Saleh Nuriyevin şəhadət zirvəsinə yüksəlməsinin ildönümü ilə əlaqədar olaraq Sumqayıt Tarix Muzeyində anım tədbiri keçirilib. Tədbirdə muzey rəhbərliyi və kollektivi, şəhidin ailə üzvləri, şəhid anaları, dövlət və müəssisə rəhbərləri, eləcə də ictimaiyyət nümayəndələri iştirak ediblər. 

Öncə şəhidin əziz xatirəsi bir dəqiqəlik sükutla yad edilib, Azərbaycanın dövlət himni səsləndirilib. 

Daha sonra Tarix Muzeyinin direktor vəzifəsini icra edən Namiq Əliyev şəhidlərin bizim həm kədər, həm də qürur yerimiz olduğunu xatırladıb. Bildirib ki, şəhid verməyən xalqın mənliyi, şəhid qanı axmayan torpaqdan isə vətən olmaz. Azərbaycan xalqı hər zaman vətənə, torpağa layiq qəhrəman oğullar yetişdirdiyi üçün çox qürurludur. Belə şəhidlərdən biri də Saleh Nuriyevdir. Hansı ki, gənc yaşında özünü vətənə, millətə və torpağa fəda edərək ən uca məqama yüksəlib. 

Daha sonra şəhid Saleh Nuriyevə ithaf olunan mahnı əsasında hazırlanan video çarx nümayiş etdirilib. 

Tədbirdə Tarix Muzeyinin əməkdaşı Səidə Səfərova və digər çıxış edənlər şəhidin həyatından, onun keçdiyi şərəfli döyüş yolundan danışıblar. Bildiriblər ki, Saleh Birinci Qarabağ Müharibəsində şəhid olan igid dayısının həyatını yaşayıb. O da 18 yaşında şəhidlik zirvəsinə yüksəlib və eynən dayısı kimi 3 ayın əsgəri olub. Qeyd olunub ki, şəhid Saleh Nuriyevin ömür yolu bu gün bütün gənclər üçün bir nümunədir. Odur ki, uşaqdan böyüyə hər kəs şəhidimizi yad edir və onun əziz xatirəsini dərin ehtiramla anır. 

Çıxışlardan sonra Sumqayıt Tarix Muzeyi tərəfindən Saleh Nuriyev haqqında film nümayiş olunub. 

Tədbirin sonunda Sumqayıt Musiqi Kollecinin müəllim heyətinin vətənpərvərlik ruhunda ifaları təqdim olunub.